யு.எஸ். ஓபன் ஆடவர் இறுதிச் சுற்று: 10-ஆவது கிராண்ட் ஸ்லாம் வென்றார் ஜோகோவிச்

யு.எஸ். ஓபன் ஆடவர் இறுதிச் சுற்றில் ரோஜர் ஃபெடரரை வீழ்த்தி, தனது 10-ஆவது கிராண்ட் ஸ்லாம் பட்டத்தை வென்றார் செர்பியாவின் நோவக் ஜோகோவிச்.
 யு.எஸ். ஓபன் டென்னிஸ் போட்டியின் ஆடவர் ஒற்றையர் பிரிவு இறுதிச் சுற்றில் உலகின் முதல் நிலை வீரரான செர்பியாவின் நோவக் ஜோகோவிச், தரவரிசையில் 2-ஆவது இடத்திலுள்ள சுவிட்சர்லாந்தின் ரோஜர் ஃபெடரரை எதிர்கொண்டார்.
 கடந்த ஞாயிற்றுக்கிழமை இரவு நடைபெற்ற இந்தப் போட்டி மழை காரணமாக 3 மணிநேரம் தாமதமாகத் தொடங்கியது. போட்டியின் முடிவில், 6-4, 5-7, 6-4, 6-4 என்ற நேர் செட்டுகளில் ஜோகோவிச் சாம்பியன் பட்டத்தைக் கைப்பற்றினார். இது அவருக்கு 2-ஆவது யு.எஸ். ஓபன் சாம்பியன் பட்டமாகும். இந்த ஆண்டில் 3-ஆவது கிராண்ட் ஸ்லாம் பட்டமும், ஒட்டுமொத்தத்தில் 10-ஆவது கிராண்ட் ஸ்லாம் பட்டமுமாகும்.
 தவறிய பிரெஞ்சு ஓபன்: இந்த சீசனில் ஜனவரியில் நடந்த ஆஸ்திரேலிய ஓபன் இறுதிப் போட்டியில் பிரிட்டனின் ஆன்டி முர்ரேவைத் தோற்கடித்தார். அதன் பிறகு ஜூன் மாதம் நடைபெற்ற பிரெஞ்சு ஓபன் இறுதிப் போட்டியில் சுவிட்சர்லாந்தின் ஸ்டானிஸ்லாஸ் வாவ்ரிங்காவிடம் தோல்வியைத் தழுவினார். ஜூலை மாதம் நடந்த விம்பிள்டன் இறுதிப் போட்டியில் ஃபெடரரை வீழ்த்தினார். தற்போது யு.எஸ். ஓபன் போட்டியிலும் சாம்பியனாகி உள்ளார். கடந்த 2011 ஆம் ஆண்டிலும் ஜோகோவிச், இதேபோன்று 3 போட்டிகளில் சாம்பியனாகி இருந்தார்.
 வெற்றிக்குப் பின்னர் ஜோகோவிச் கூறுகையில், "ஃபெடரர் மீது நான் மிகப் பெரிய மரியாதை வைத்திருக்கிறேன். அதேபோன்று என்னுடனும், இதர வீரர்களுக்கு எதிராகவும் அவர் வெளிப்படுத்தும் ஆட்டத்தின் மீதும் மதிப்பு கொண்டிருக்கிறேன்' என்றார்.
 மிகப் பெரிய சவால்: 34 வயதாகும் ரோஜர் ஃபெடரர், தனது 18-ஆவது கிராண்ட் ஸ்லாம் பட்டத்தை எதிர்நோக்கி இருந்தார். ஆனால், ஜோகோவிச்சின் ஆதிக்கத்தை அவரால் முறியடிக்க இயலவில்லை. போட்டிக்குப் பின்னர் ஃபெடரர் கூறுகையில், "ஜோகோவிச் போன்ற பெரிய சாம்பியன்களுக்கு எதிராக விளையாடுவது என்பது மிகப்பெரிய சவாலாகும்' என்றார். ஃபெடரர் கடைசியாக கடந்த 2012ஆம் ஆண்டு நடைபெற்ற விம்பிள்டன் போட்டியில் கிராண்ட் ஸ்லாம் வென்றார்.
ஜோகோவிச்சின் கிராண்ட் ஸ்லாம் பட்டங்கள்:
 ஆஸ்திரேலிய ஓபன் 5
 விம்பிள்டன் 3
 யு.எஸ். ஓபன் 2
 மொத்தம் 10
"ஃபெடரர் மீது நான் மிகப் பெரிய மரியாதை வைத்திருக்கிறேன். அதேபோன்று என்னுடனும், இதர வீரர்களுக்கு எதிராகவும் அவர் வெளிப்படுத்தும் ஆட்டத்தின் மீதும் மதிப்பு கொண்டிருக்கிறேன்."
 - ஜோகோவிச்.