தங்கம் வென்ற வீராங்கனையிடம் காதலை வெளிப்படுத்திய சகவீரர்!

பாரீஸ் ஒலிம்பிக்கில் தங்கம் வென்ற சீன பாட்மின்டன் வீராங்கனையிடம் சகவீரர் தனது காதலை வெளிப்படுத்திய நிகழ்வு அரங்கேறியுள்ளது.

பாரீஸ் ஒலிம்பிக் தொடர் விறுவிறுப்பாக நடைபெற்று வருகிறது. இதில் நேற்று கலப்பு இரட்டையர் பிரிவு இறுதிப்போட்டியில் சீனாவின் யா கியூயாங் ஹுஆங் – செங் சிவெய் ஜோடியும், கொரியாவின் சியோ சியூங் ஜே – சா யூ ஜூங் ஜோடியும் மோதினர்.

தொடக்கம் முதலே சிறப்பாக ஆடிய சீன ஜோடி கொரிய ஜோடியை வீழ்த்தி தங்கப் பதக்கத்தை வென்றது. தங்கப் பதக்கத்தை வென்ற உற்சாகத்தில் இருந்த சீன வீராங்கனை யா கியூயாங்கிற்கு மற்றொரு ஒலிம்பிக் மேடையிலேயே மற்றொரு இனிப்பான சம்பவமும் அரங்கேறியது.

தங்கம் வென்ற உற்சாகத்தில் இருந்த யா கியூயாங்கிடம் அவருடன் இத்தொடரில் பங்கேற்றுள்ள சக வீரரான லியூ யூசென் தனது காதலை வெளிப்படுத்தினார். பதக்கம் வழங்கும் நிகழ்ச்சிக்குப் பிறகு வெற்றிக்களிப்பில் இருந்தவரிடம், மண்டியிட்டு தனது காதலை வெளிப்படுத்தி, தன்னை திருமணம் செய்துகொள்ளும்படி மோதிரத்தை நீட்டினார்.

இதனை சற்றும் எதிர்பாராத, யா கியூயாங் ஆரம்பத்தில் அதிர்ச்சி அடைந்தாலும், பின்னர் மகிழ்ச்சி வெள்ளத்தில் மூழ்கினார். அவரின் காதலை ஏற்றுக்கொள்வதை குறிப்பிடும் வகையில், மோதிரத்தை அணிந்துவிடுமாறு தனது விரல்களை நீட்டினார். இந்த விடியோ சமூக வலைதளங்களில் அதிகம் பகிரப்பட்டு வருகிறது.

தனது காதலி பதக்கம் வெல்வார் என்ற நம்பிக்கையோடு காத்திருந்து, தனது காதலை லியூ யூசென் வெளிப்படுத்தியுள்ளதாக சமூக வலைதளத்தில் அவருக்கு வாழ்த்துகள் குவிந்து வருகின்றன.

ஒலிம்பிக் ஆண்கள் இரட்டையர் பிரிவில் லியூ யூசென் பங்கேற்கிறார் என்பது குறிப்பிடத்தக்கது.