சதம் விளாசிய ஸ்மித்: முதல் இன்னிங்ஸில் 416 ரன்களுக்கு ஆஸ்திரேலியா ஆட்டமிழப்பு!

இங்கிலாந்துக்கு எதிரான ஆஷஸ் தொடரின் 2-வது டெஸ்டின் முதல் இன்னிங்ஸில் 416 ரன்களுக்கு ஆஸ்திரேலியா ஆட்டமிழந்தது.

இங்கிலாந்து-ஆஸ்திரேலியா இடையேயான ஆஷஸ் தொடரின் இரண்டாவது போட்டி லண்டனில் உள்ள லார்ட்ஸ் மைதானத்தில் நேற்று (ஜூன் 28) முதல் தொடங்கியது. முதலில் பேட் செய்து வரும் ஆஸ்திரேலிய அணி நேற்று முதல் நாள் ஆட்டநேர முடிவில் 5 விக்கெட்டுகளை இழந்து 339 ரன்கள் எடுத்து வலுவான நிலையில் இருந்தது. ஸ்டீவன் ஸ்மித் 85  ரன்களுடனும், அலெக்ஸ் கேரி 11 ரன்களுடனும் களத்தில் இருந்தனர்.

இதையும் படிக்க: இந்த மூன்று அணிகளால் இறுதியில் டெஸ்ட் கிரிக்கெட் அழிந்துவிடும்: கிறிஸ் கெயில்

இந்த நிலையில், இன்று (ஜூன் 29) இரண்டாம் நாள் ஆட்டம் தொடங்கியது. ஆட்டம் தொடங்கிய சிறிது நேரத்திலேயே அலெக்ஸ் கேரி 22 ரன்களுக்கு ஆட்டமிழந்து வெளியேறினார். அதன்பின் களமிறங்கிய மிட்செல் ஸ்டார்க் 6 ரன்களில் ஆட்டமிழக்க பாட் கம்மின்ஸ் களமிறங்கினார். மறுமுனையில் சிறப்பாக விளையாடிய ஸ்டீவன் ஸ்மித் சதமடித்து அசத்தினார். அவர் 184 பந்துகளில் 110 ரன்கள் குவித்தார். அதில் 15 பவுண்டரிகள் அடங்கும். அதன்பின் களமிறங்கிய நாதன் லயன் 7 ரன்களிலும், ஹேசில்வுட் 4 ரன்களிலும் ஆட்டமிழந்தனர். ஆஸ்திரேலிய அணி 416 ரன்களுக்கு தனது அனைத்து விக்கெட்டுகளையும் இழந்தது. 

இங்கிலாந்து தரப்பில் சிறப்பாக  பந்துவீசிய ஜோஷ் டங் மற்றும் ராபின்சன் தலா 3  விக்கெட்டுகளைக் கைப்பற்றினர். ஜோ ரூட் 2 விக்கெட்டுகளையும், ஜேம்ஸ் ஆண்டர்சன் மற்றும் ஸ்டூவர்ட் பிராட் தலா ஒரு விக்கெட்டினையும் கைப்பற்றினர்.

இதையும் படிக்க: இன்ஸ்டாகிராமில் ரிஷப் பந்த் உருக்கமான பதிவு!

இதனையடுத்து, இங்கிலாந்து அணி தனது முதல் இன்னிங்ஸில் விளையாடி வருகிறது.