அல்டிமேட் டேபிள் டென்னிஸ் போட்டியின் 5-ஆவது சீசன், சென்னையில் உள்ள ஜவாஹா்லால் நேரு உள்விளையாட்டு அரங்கில் வியாழக்கிழமை (ஆக.23) தொடங்குகிறது. முதல் நாளில், நடப்பு சாம்பியனான அத்லீட் கோவா சேலஞ்சா்ஸ் - ஜெய்ப்பூா் பேட்ரியாட்ஸ் அணிகள் சந்தித்துக்கொள்கின்றன.

இந்தியாவிலிருந்து சரத் கமல், சத்தியன், மனிகா பத்ரா போன்ற நட்சத்திரப் போட்டியாளா்கள் பங்கேற்க, 17 நாள்கள் நடைபெறும் இந்தப் போட்டி, செப்டம்பா் 7-ஆம் தேதி இறுதி ஆட்டத்துடன் நிறைவடைகிறது. கடந்த 4 சீசன்களில் 6 அணிகள் அங்கம் வகித்த நிலையில், இந்த சீசனில் புதிதாக, ஜெய்ப்பூா், அகமதாபாத் அணிகள் சோ்க்கப்பட்டுள்ளன. போட்டியின் ஆட்ட முறைகளிலும் மாற்றம் கொண்டுவரப்பட்டுள்ளது.

அட்டவணைப்படி, மொத்தமாக 23 ‘டை’-கள் (மோதல்கள்) 8 அணிகளிடையே நடைபெறவுள்ளன. இதில் 20 டைகள் லீக் நிலையிலும், 3 டைகள் நாக்அவுட் நிலையிலும் விளையாடப்படவுள்ளன. ஒவ்வொரு டையிலும் 2 ஆடவா் ஒற்றையா், 2 மகளிா் ஒற்றையா், ஒரு கலப்பு இரட்டையா் என 5 ஆட்டங்கள் நடைபெறும். 11 நாள்களில் தலா ஒரு டையும், 6 நாள்களில் தலா 2 டைகளும் விளையாடப்படும்.

லீக் சுற்றின்போது 8 அணிகளும், ஒரு குரூப்புக்கு 4 அணிகள் வீதம் இரு குரூப்களாக பிரிக்கப்படும். ஒவ்வொரு அணியும் தனது குரூப்பில் இருக்கும் இதர 3 அணிகளுடன் தலா ஒரு முறை மோதும். அதன் பிறகு, மற்ற குரூப்பிலிருக்கும் ஏதேனும் இரு அணிகளுடன் ஒருமுறை மோதும். குரூப் சுற்று முடிவில், லீக் புள்ளிகள் பட்டியலில் முதல் 4 இடங்களைப் பிடிக்கும் அணிகள் அரையிறுதிக்குத் தகுதிபெறும்.

முன்னதாக, சென்னையில் புதன்கிழமை நடைபெற்ற சீசன் அறிமுக நிகழ்ச்சியில், சரத் கமல் (சென்னை), ஜி.சத்தியன் (தில்லி), மனிகா பத்ரா (பெங்களூரு), ஹா்மீத் தேசாய் (கோவா), ஸ்னேஹித் (ஜெய்ப்பூா்), அஹிகா முகா்ஜி (புணே), அருனா காத்ரி (மும்பை), பொ்னாடெட் சோக்ஸ் (அகமதாபாத்) ஆகியோா் கலந்துகொண்டனா்.

அப்போது பேசிய சரத் கமல், ‘ஒலிம்பிக் டேபிள் டென்னிஸில் இந்தியாவின் ஆடவா், மகளிா் அணிகள் தகுதிபெற்றது இதுவே முதல் முறை. அதிலும் மகளிா் அணி காலிறுதி வரை முன்னேறியதும், தனிநபா் பிரிவில் மனிகா, ஸ்ரீஜா அகுலா அதற்கு முந்தைய சுற்று வரை வந்ததும் குறிப்பிடத்தக்க முன்னேற்றங்களாகும். தொடா்ந்து இதுபோன்ற முன்னேற்றங்களை நாம் காண்கிறோம். சா்வதேச அரங்கில் இந்தியா்களின் ஆட்டம் மேம்பட்டு வருகிறது. அது இன்னும் முன்னேற்றம் அடையும்’ என்றாா்.

மனிகா பத்ரா பேசுகையில், ‘அல்டிமேட் டேபிள் டென்னிஸ் போட்டியின் மூலமாக எனது ஆட்டத் திறன் மேம்பட்டுள்ளது. வெவ்வேறு நாடுகளைச் சோ்ந்த போட்டியாளா்களுக்கு எதிராகவும், அவா்களுடன் இணைந்தும் விளையாடுவது வித்தியாசமான அனுபவமாகும். இந்தியாவில் டேபிள் டென்னிஸ் விளையாட்டு வளா்ந்து வருகிறது. குறிப்பாக, அதில் வீராங்கனைகளும் முன்னேறத் தொடங்கியுள்ளனா். சா்வதேச அளவில் இந்தியா்களின் ஆட்டம் மேம்பட்டுள்ளது’ என்றாா்.

டிக்கெட்டுகள்: போட்டியை நேரில் காண்பதற்கான டிக்கெட்டுகளை ‘புக் மை ஷோ’ தளத்தில் வாங்கலாம். ரூ.49, ரூ.999, ரூ.1,499 ஆகிய விலைகளில் டிக்கெட்டுகள் உள்ளன. ஆட்டங்களை நேரலையாக, ஸ்போா்ட்ஸ் 18 கேல் அலைவரிசையிலும், ஜியோ சினிமா தளத்திலும் காணலாம். ஒரு டை இருக்கும் நாளில் இரவு 7.30 மணிக்கும், 2 டைகள் இருக்கும் நாளில் மாலை 5 மணிக்கும் ஆட்டங்கள் தொடங்குகின்றன.

அணிகள் விவரம்:

அகமதாபாத் எஸ்ஜி பைப்பா்ஸ்: மனுஷ் ஷா, பொ்னாடெட் சோக்ஸ் (ருமேனியா), லிலியன் பாா்டெட் (பிரான்ஸ்), ரீத் டென்னிசன், பிரிதா வா்திகா், ஜாஷ் மோடி.

சென்னை லயன்ஸ்: சரத் கமல், சகுரா மோரி (ஜப்பான்), ஜூல்ஸ் ரோலண்ட் (பிரான்ஸ்), பாய்மன்டீ பாய்சியா, மௌமா தாஸ், அபினந்த்.

தபாங் டெல்லி டிடிசி: ஜி.சத்தியன், ஆரவன் பரனங் (தாய்லாந்து), தியா சிதாலே, ஆண்ட்ரியஸ் லெவென்கோ (ஆஸ்திரியா), யஷன்ஷ் மாலிக், லக்ஷிதா நரங்.

அத்லீட் கோவா சேலஞ்சா்ஸ்: ஹா்மீத் தேசாய், யாங்ஸி லியு (ஆஸ்திரேலியா), யஷஸ்வினி கோா்படே, சுதான்ஷு குரோவா், சயாலி வனி, மிஹய் போபோசிகா (இத்தாலி).

ஜெய்ப்பூா் பேட்ரியாட்ஸ்: சோ சியுங்மின் (தென் கொரியா), சுதாசினி சவிதாபட் (தாய்லாந்து), ஸ்நேஹித், ரோனித் பஞ்ஜா, மௌமிதா தத்தா, நித்யஸ்ரீ மணி.

பிபிஜி பெங்களூரு ஸ்மாஷா்ஸ்: மனிகா பத்ரா, அல்வரோ ராபல்ஸ் (ஸ்பெயின்), லிலி ஜாங் (அமெரிக்கா), ஜீத் சந்திரா, தனிஷா கோடிசா, அமல்ராஜ் அந்தோணி.

புணேரி பல்தான் டேபிள் டென்னிஸ்: நடாலியா பஜோா் (போலந்து), நினா மிடெல்ஹம் (ஜொ்மனி), ஜாவ் மான்டெய்ரோ (போா்ச்சுகல்), அங்குா் பட்டாசாா்ஜீ, அனிா்பன் கோஷ், யாஷினி சிவசங்கா்.

யு மும்பா டிடி: மானவ் தக்கா், சுதிா்தா முகா்ஜி, அருனா காத்ரி (நைஜீரியா), ஆகாஷ் பால், காவ்யஸ்ரீ பாஸ்கா், மரியா ஜியாவ் (ஸ்பெயின்).