கடும் பாதிப்புள்ள மாற்றுத் திறனாளிகள் 960 பேருக்கு சிறப்பு சக்கர நாற்காலிகள்: முதல்வர் அறிவிப்பு

தண்டுவட பாதிப்பு போன்ற கடும் பாதிப்புள்ள 960 மாற்றுத் திறனாளிகளுக்கு மாவட்டந்தோறும் சிறப்பு சக்கர நாற்காலிகள் வழங்கப்படும் என்று முதல்வர் ஜெயலலிதா அறிவித்தார்.
 சட்டப் பேரவையில் விதி 110-இன் கீழ், திங்கள்கிழமை அவர் வெளியிட்ட அறிவிப்பு:
 தமிழகத்தில் மாற்றுத் திறனாளிகளுக்கென 23 அரசு சிறப்புப் பள்ளிகள் செயல்பட்டு வருகின்றன. புதுக்கோட்டையில் காது கேளாதோருக்கான அரசு நடுநிலைப் பள்ளி 22 ஆண்டுகளாக வாடகைக் கட்டடத்தில் செயல்பட்டு வருகிறது.
 அந்தப் பள்ளிக்கு 5,414 சதுர அடி பரப்பில் ரூ. ஒரு கோடி செலவில் விடுதி, வகுப்பறைகளுடன் கூடிய சொந்தக் கட்டடம் கட்டப்படும்.
 மாற்றுத் திறனாளிகளுக்கு அளிக்கப்படும் பல்வேறு திட்டங்களில் மடக்கு சக்கர நாற்காலியும் ஒன்றாகும். இந்தச் சாதாரண மடக்கு சக்கர நாற்காலிகள் முதுகுத் தண்டுவடம் பாதிக்கப்பட்ட நபர்களின் தேவையை நிறைவு செய்வதாக இல்லை.
 மேலும், மாற்றுத் திறனாளிகளுக்கான உதவி உபகரணங்கள் வழங்கும் திட்டத்தின் கீழ், முதுகுத் தண்டுவடம் பாதிக்கப்பட்டவர்களுக்கு பிரத்யேகமான உபகரங்கள் ஏதுமில்லை.
 எனவே, முதுகுத் தண்டுவடம், நரம்பு உறை தேய்வு நோய், தண்டுவடக் குறைபாடு நோய் ஆகியவற்றால் பாதிக்கப்பட்டவர்களுக்கு என ரூ. 20 ஆயிரம் மதிப்பீட்டில் பிரத்யேகமாக வடிவமைக்கப்பட்ட சிறப்பு சக்கர நாற்காலி வழங்கப்படும்.
 முதல்கட்டமாக, ஒரு மாவட்டத்துக்கு 30 என்ற எண்ணிக்கையில் மொத்தம் 960 பேருக்கு ரூ. 1.92 கோடியில் சக்கர நாற்காலிகள் வழங்கப்படும் என்று முதல்வர் ஜெயலலிதா அறிவித்தார்.