நடக்கும்போது ஒரு பக்கமாகத் தலையைச் சாய்த்துவிட்டு செல்போனில் பேசிக் கொண்டு நடக்க வேண்டாம். முடிந்தவரை செல்போனை வீட்டில் வைத்துவிட்டு நடப்பது நல்லது. தலையை உயர்த்தி, வயிற்றின் தசைகளை மென்மையாக உள்ளிழுத்து கைவீசி நடப்பது நல்லது.

சரியான நடைபயிற்சியில் வியர்ப்பது நல்லது. எனவே இறுக்கமான, பாலியஸ்டர் ஆடைகளைத் தவிர்க்கவும். உடல் சோர்ந்துப் போகாமல் வியர்வையை உறிஞ்சும் வகையில் ஏதுவான காட்டன் ஆடைகளை அணிவது நல்லது.

 நடைபயிற்சி தொடங்கிய முதல் ஐந்து நிமிடங்கள் உடலுக்கு உற்சாகம். 10 முதல் 20 நிமிடங்களில் உடல் வெப்பமடைதல், தோலுடன் சேர்ந்துள்ள ரத்தக் குழாய்கள் விரிவடைந்து வெப்பம் வெளியேறி வியர்க்கத் தொடங்கும். சக்தியளிக்கும் ஹார்மோன்களின் சுரப்பு, சுவாசம் அதிகரிப்பு நடைபெறும்.

சுமார் 30 முதல் 45 நிமிடங்களில் உடல் லேசாகி கொழுப்புச் சத்து எரிந்து இன்சுலின் சுரப்பு சீராகும்.

ஒருமணி நேரத்தில் நமது நடையின் வேகத்தைக் குறைக்க, இதயத் துடிப்புச் சீராகி வியர்வை அடங்கிய பின்னரும் ஒருமணி நேரம் கலோரிகள் செலவாகும் என்பது மருத்துவ ரீதியான உண்மை,

அதிக பருமன் உடையவர்கள், இதயம் பலவீனம் உள்ளவர்கள், ஆஸ்துமா பிரச்னை உடையவர்கள், எலும்பு- மூட்டு நோய்களால் பாதிக்கப்பட்டோர் மருத்துவர்களின் ஆலோசனையைப் பெற்று நடைபயிற்சியை மேற்கொள்வதே சிறந்தது.

-எம்.அசோக்ராஜா, அரவக்குறிச்சிப்பட்டி.