இந்திய வம்சாவளியைச் சேர்ந்தவர் ஜெர்மனியில் மாநகர மேயராகத் தேர்வு

ஜெர்மனியின் பான் நகரில் நடைபெற்ற மேயர் தேர்தலில் இந்திய வம்சாவளியைச் சேர்ந்த அசோக் ஸ்ரீதரன் (49) வெற்றி பெற்றார்.
 இந்தியாவிலிருந்து குடியேறிய தந்தைக்கும், ஜெர்மனியைச் சேர்ந்த தாய்க்கும் பிறந்தவரான இவர், அதிபர் ஏஞ்சலா மெர்கெலின் கிறிஸ்தவ ஜனநாயக ஒன்றியம் கட்சியின் சார்பாக தேர்தலில் போட்டியிட்டார்.
 தேர்தலில் அசோக் ஸ்ரீதரன் வெற்றி பெற்றதன் மூலம், சமூக ஜனநாயகக் கட்சி மேயர்கள் பான் நகரை தொடர்ந்து 21 ஆண்டுகளாக நிர்வகித்து வந்த நிலைக்கு முற்றுப்புள்ளி வைக்கப்பட்டுள்ளது.
 இந்தத் தேர்தலில் 50.06 சதவீத வாக்குகளுடன் அசோக் ஸ்ரீதரன் அறுதிப் பெரும்பான்மை பெற்றிருப்பது அரசியல் பார்வையாளர்களை வியப்படையச் செய்துள்ளதாகக் கூறப்படுகிறது.
 பான் நகர மேயராகத் தேர்ந்தெடுக்கப்படுவதற்கு முன்னர், அருகிலுள்ள கோனிக்ஸ்வின்டர் நகரின் துணை மேயராக அசோக் ஸ்ரீதரன் பொறுப்பு வகித்து வந்தார்.