ஹஜ் கூட்ட நெரிசலில் பலியான இந்தியர்களின் எண்ணிக்கை 18 ஆக உயர்வு

சவூதி அரேபியாவின் மெக்கா நகர் அருகே கடந்த வியாழக்கிழமை நேரிட்ட கூட்ட நெரிசலில் சிக்கி பலியான இந்திய ஹஜ் யாத்ரீகர்களின் எண்ணிக்கை 18ஆக உயர்ந்துள்ளது.

இதுகுறித்து இந்திய வெளியுறவு அமைச்சக செய்தித் தொடர்பாளர் விகாஸ் ஸ்வரூப் சனிக்கிழமை கூறியதாவது:

மெக்கா நகரில் இருக்கும் நமது நாட்டு அதிகாரிகள் உண்மை நிலவரத்தை ஆராயும் பணியிலும், காணாமல் போன யாத்ரீகர்கள் குறித்து அவர்களது குடும்பத்தினரிடம் தகவல் தெரிவிக்கும் பணியிலும் தொடர்ந்து ஈடுபட்டுள்ளனர். அங்கிருந்து நமக்கு கிடைத்த புதிய தகவல்கள், கூட்ட நெரிசலில் சிக்கி 18 இந்தியர்கள் பலியாகியுள்ளதாக தெரிவிக்கின்றன.

கூட்ட நெரிசலில் இறந்த இந்தியர்களை அடையாளம் காணும் பணியையும், உயிரிழந்தோரின் உடல்களை இந்தியாவுக்கு அனுப்பும் பணியிலும் சவூதி அரேபிய அதிகாரிகளுடன் சேர்ந்து நமது நாட்டு அதிகாரிகள் ஈடுபட்டு வருகின்றனர் என்றார் விகாஸ் ஸ்வரூப்.

ஹஜ் கூட்ட நெரிசலில் சிக்கி இறந்த 18 இந்தியர்கள், குஜராத் (11), தமிழகம் (3), தெலங்கானா, கேரளம், ஜார்க்கண்ட், உத்தரப் பிரதேசம் (தலா ஒருவர்) ஆகிய மாநிலங்களைச் சேர்ந்தவர்கள் ஆவர்.

இதில், 4 பேர், ஜார்க்கண்ட் மாநிலத்தைச் சேர்ந்த ரசூல் அலி, உத்தரப் பிரதேசத்தை சேர்ந்த மொய்னுதீன், குஜராத்தைச் சேர்ந்த ஹபீஜாபஹென் சதார்ஷா திவான், சையது அப்துல் ஹுசேன் என்று அடையாளம் கண்டறியப்பட்டுள்ளது.

சவூதி அரேபியாவின் மெக்கா அருகே மினாவில் "சாத்தான் மீது கல்லெறிதல்' நிகழ்ச்சியில் கலந்து கொள்வதற்காக லட்சக்கணக்கான யாத்ரீகர்கள் கடந்த வியாழக்கிழமை திரண்டிருந்தனர். அப்போது அங்கு நேரிட்ட கூட்ட நெரிசலில் சிக்கி, 719 யாத்ரீகர்கள் பலியாகினர். மேலும், 13 இந்தியர்கள் உள்பட 863 பேர் காயமடைந்தனர்.