ஷிராடி வனப்பகுதி நெடுஞ்சாலையில்  5 மாதங்களுக்கு வாகனங்கள் செல்லத் தடை: அமைச்சர் எச்.டி.ரேவண்ணா

மழையால் பாதிக்கப்பட்டுள்ள ஷிராடி வனப் பகுதி நெடுஞ்சாலையில் 5 மாதங்களுக்கு வாகனங்கள் செல்லத் தடை விதிக்கப்பட்டுள்ளது என்று கர்நாடக மாநில பொதுப்பணித் துறை அமைச்சர் எச்.டி.ரேவண்ணா தெரிவித்தார்.
ஹாசனில் அவர் ஞாயிற்றுக்கிழமை செய்தியாளர்களிடம் கூறியது:-
குடகு,  தென் கன்னட மாவட்டங்களில் பெய்து வரும் கன மழையால் ஷிராடி வனப்பகுதியில் உள்ள தேசிய நெடுஞ்சாலையில் மண்சரிவு ஏற்பட்டுள்ளது. இதனால் அந்தச் சாலை கடுமையாகப் பாதிக்கப்பட்டுள்ளது. அதனை சீரமைக்க ரூ. 130 கோடி அளவுக்கு நிதி தேவைப்படுகிறது. எனவே அடுத்த 5 மாதங்களுக்கு அந்த சாலையில் வாகனங்கள் செல்ல தடை விதிக்கப்பட்டுள்ளது. 
குடகு மாவட்டங்களில் மழையால் அனைத்து சாலைகளும் பழுதாகியுள்ளன. இதனால் அந்தப் பகுதியில் மக்கள் போக்குவரத்து இல்லாமல் பெரிதும் பாதிக்கப்பட்டுள்ளனர். 
அதேபோல குதிரேமூக் பகுதியில் உள்ள தேசிய நெடுஞ்சாலை 169-இல் மழையால் பாதிப்பு ஏற்பட்டுள்ளது. இதனால் அந்தப் பகுதியிலும் போக்குவரத்து பாதிக்கப்பட்டுள்ளது. மழையால் சார்முடி வனப்பகுதியில் உள்ள சாலையிலும் போக்குவரத்து பாதிக்கப்பட்டுள்ளது என்றார் அவர்.