சென்னை மாநகராட்சி வளாகத்தில் ‘அம்மா மாளிகை’ இன்று திறப்பு

சென்னை மாநகராட்சி வளாகத்தில் ரூ. 124 கோடி மதிப்பீட்டில் புதிதாகக் கட்டப்பட்டுள்ள அம்மா மாளிகையை முதல்வர் ஜெயலலிதா செவ்வாய்க்கிழமை திறந்துவைக்கிறார்.
 சென்னை மாநகராட்சி தலைமையகமாக ரிப்பன் கட்டடம் செயல்பட்டு வருகிறது. பழமையான இந்தக் கட்டடத்தில் இடவசதி இல்லாததால் பல்வேறு துறைகள் வளாகத்தில் உள்ள பிற கட்டடங்களில் இயங்கி வருகின்றன.
 இந்த நிலையில், புதிய கட்டடப் பணி தொடங்கப்பட்டு, தற்போது பணிகள் முடிக்கப்பட்டுள்ளன. இந்தப் புதிய கட்டடத்துக்கு "அம்மா மாளிகை' என்று பெயர் சூட்டப்பட்டுள்ளது.
 வாகன நிறுத்தம், குளிர்சாதன வசதி எனப் பல்வேறு வசதிகளுடன் கட்டப்பட்டுள்ள இந்தக் கட்டடத்தை செவ்வாய்க்கிழமை நடைபெறும் நிகழ்ச்சியில் தமிழக முதல்வர் ஜெயலலிதா காண் ஒலிக் காட்சி மூலம் திறந்து வைக்கிறார். அதன் பின்னர், மாநகராட்சியின் அனைத்து துறைகளும் புதிய கட்டடத்திலேயே இயங்கும். ரிப்பன் கட்டடத்தை அருங்காட்சியகமாக மாற்றவும் பிற கட்டடங்களை இடிக்கவும் மாநகராட்சி திட்டமிட்டுள்ளது.