மதுவிலக்கு, இலங்கை மீது விசாரணை: சென்னையில் தமாகா உண்ணாவிரதம்

தமிழகத்தில் மதுவிலக்கு, இலங்கை மீது சர்வதேச விசாரணை நடத்த வேண்டும் ஆகிய கோரிக்கைகளை வலியுறுத்தி, தமிழ் மாநில காங்கிரஸ் கட்சி சார்பில் சென்னையில் உண்ணாவிரதப் போராட்டம் சனிக்கிழமை நடைபெற்றது.

கட்சியின் தலைவர் ஜி.கே.வாசன் தலைமையில் நடந்த போராட்டத்தில் ஏராளமான கட்சியினர் பங்கேற்றனர். அதில், ஜி.கே.வாசன் பேசியதாவது:

மதுவினால் நாடும், வீடும் சீரழிகிறது. அதுவே சமூக விரோதச் செயல்களுக்கு காரணமாக அமைகிறது. மாணவர்களும், இளம் பெண்களும் மதுவுக்கு அடிமையாகி வருவது வேதனைக்குரியது. ஒட்டுமொத்த தமிழகத்தின் வளர்ச்சியும் இதனால் தடைபடுகிறது. தமிழக மக்களின் வாழ்வை பாதுகாக்க பூரண மதுவிலக்கை படிப்படியாக அறிவிக்க வேண்டும்.

மீனவர்கள் பிரச்னை: தமிழக மீனவர்கள் தெரியாமல் எல்லை தாண்டிச் செல்லும் போது இலங்கை கடற்படை சுடுவதும், கொடுமைப்படுத்துவதும் ஏற்புடையது அல்ல. மத்திய அரசு இதைத் தடுக்க நடவடிக்கை எடுக்க வேண்டும். இலங்கைப் போரில் நடந்த மனித உரிமை மீறல் தொடர்பாக சர்வதேச விசாரணை நடத்த வேண்டும். இதற்கு இந்திய அரசு அழுத்தம் கொடுக்க வேண்டும் என்றார் ஜி.கே.வாசன்.

உண்ணாவிரதத்தில் கட்சியின் நிர்வாகிகளான ஞானதேசிகன், பீட்டர் அல்போன்ஸ், ஞானசேகரன், கோவை தங்கம், விடியல் சேகர் உள்ளிட்ட பலரும் கலந்து கொண்டனர்.