தங்கச் சங்கிலி பறிப்பு: இளைஞரை விரட்டிப் பிடித்த ரயில்வே காவலர்கள்

சென்னை பூங்கா ரயில் நிலையத்தில் நடந்துவந்தவரிடம் தங்க சங்கிலியைப் பறித்து, கத்தியால் தாக்கிவிட்டுத் தப்பி ஓடிய இரு இளைஞர்களில் ஒருவரை ரயில்வே காவலர்கள் விரட்டிப் பிடித்துள்ளனர்.
சென்னை மேற்கு மாம்பலம் கோதண்டராமன் கோயில் தெருவைச் சேர்ந்த மஞ்சுநாத் (30), மாம்பலம் ரயில் நிலையத்தில் இருந்து புதன்கிழமை மாலை மின்சார ரயிலில் பூங்கா ரயில் நிலையத்துக்கு வந்தார். முதல் நடைமேடையில் நடந்து வந்தபோது பின்னால் வந்த ஒருவர் திடீரென மஞ்சுநாத் கழுத்தில் கிடந்த தங்கச் சங்கிலியை பறித்துக் கொண்டு ஓடினர். மஞ்சுநாத் சத்தமிட்டதால் மற்றொருவர் கத்தியால் தாக்கி விட்டு இருவரும் தப்பியோடினர்
அங்கிருந்த ரயில்வே காவலர்கள் ரமேஷ், கீர்த்திவாசன், சுரேஷ்குமார் ஆகியோர் தப்பியோடிய இருவரையும் விரட்டிச் சென்றனர். அவர்களில் ஒருவர் மட்டும் பிடிபட்டார்.
போலீஸார் விசாரணையில் பிடிபட்டவர் சைதாப்பேட்டை கோகுல் (20) என்பது தெரியவந்தது. தப்பியோடியவர் பெயர் இளந்தென்றல் (20) என்பதும் தெரியவந்தது. கோகுல் கைது செய்யப்பட்டார். அவரிடமிருந்த தங்கச் சங்கிலி பறிமுதல் செய்யப்பட்டது. 
தப்பியோடியவரை விரட்டிப்பிடித்த ரமேஷ், கீர்த்திவாசன், சுரேஷ்குமார் ஆகியோரை ரயில்வே ஏடிஜிபி சைலேந்திரபாபு பாராட்டிப் பரிசளித்தார்.