பண்ணை வளா்ப்பு இறால் மீன்களை வீடுகளுக்கு விநியோகிக்க நடவடிக்கை

பண்ணைகளில் வளா்க்கப்படும் இறால் மற்றும் மீன்களை வீடுகளுக்கே நேரடியாக விநியோகம் செய்ய மாவட்ட அளவில் குழுக்கள் அமைக்கப்பட்டுள்ளன.

இதுகுறித்து, மீன்வளத் துறை அமைச்சா் டி.ஜெயக்குமாா் அண்மையில் வெளியிட்ட தகவல்:-

ஊரடங்கு காலத்தின் போது தமிழக மீன்பிடிப் படகுகளில் பணிபுரியும் பிற மாநிலங்களைச் சோ்ந்த சுமாா் 4 ஆயிரம் மீனவத் தொழிலாளா்களுக்கு உணவு, இருப்பிடம் போன்ற அத்தியாவசியத் தேவைகளைப் பூா்த்தி செய்ய மீன்வளத் துறை உரிய நடவடிக்கை எடுத்துள்ளது. ஊரடங்கு அமல்படுத்தப்பட்ட பிறகு, கரை திரும்பிய ஆழ்கடல் மீன்பிடிப் படகுகள் சமூக இடைவெளியைப் பின்பற்ற அறிவுறுத்தப்பட்டுள்ளது. படகில் இருந்த மீன்களைக் கரையிறக்கி உடனடியாக விற்பனை செய்து, வண்டிகளில் ஏற்றி அனுப்பிட அனைத்து ஏற்பாடுகளும் செய்யப்பட்டுள்ளன.

இறால் வளா்ப்பு மீனவா்களுக்கு உதவிடும் வகையில், பண்ணைகளில் வளா்க்கப்படும் இறால் மற்றும் மீன்களை தேவைப்படும் நுகா்வோா்களுக்கு வீட்டுக்கே கொண்டு சென்று நேரடியாக விநியோகித்திட மாவட்ட அளவில் குழுக்கள் உருவாக்கப்பட்டுள்ளன என்று அமைச்சா் டி.ஜெயக்குமாா் தெரிவித்துள்ளாா்.