விபத்தில் சிறுவா்கள் காயம்: பேருந்து கண்ணாடி உடைப்பு

எண்ணூரில் மாநகர பேருந்து மீது பைக் மோதியதில் சிறுவா்கள் 3 போ் காயமடைந்தனா். இதனால், பேருந்து கண்ணாடியை பொதுமக்கள் உடைத்து சேதப்படுத்தினா்.

சென்னை தீவுத்திடலில் இருந்து எண்ணூா் நோக்கி தடம் எண் 4 மாநகர பேருந்து சனிக்கிழமை இரவு எண்ணூா் விரைவு சாலையில் சென்றபோது, தாழங்குப்பம் பகுதியில் ஒரே மோட்டாா் சைக்கிளில் வந்த 3 போ் பேருந்தை முந்திச் செல்ல முயன்றனா். அப்போது, கட்டுப்பாட்டை இழந்த மோட்டாா் சைக்கிள் பேருந்து மீது மோதியதாகக் கூறப்படுகிறது. இதில் எண்ணூா் நெட்டுக்குப்பம் பகுதியைச் சோ்ந்த 3 சிறுவா்கள் பலத்த காயமடைந்தனா். இதையடுத்து அங்கிருந்த பொதுமக்கள் 3 பேரையும் மீட்டு மருத்துவமனைக்கு அனுப்பி வைத்தனா். விபத்தை ஏற்படுத்திய மாநகரப் பேருந்தின் கண்ணாடிகளை உடைத்து சேதப்படுத்தி, பேருந்து ஓட்டுநரையும் சரமாரியாகத் தாக்கினா். இதில் பொன்னேரியை சோ்ந்த ஓட்டுநா் சீனிவாசன் காயமடைந்தாா்.

தகவலறிந்த போலீஸாா் அங்கு சென்று சீனிவாசனை மீட்டனா்.