சென்னை மாநகராட்சியில் 4,192 வீடுகளில் கொசுப்புழு அழிப்பு

சென்னை மாநகராட்சிப் பகுதிகளில் 6 நாள்களில் 4,192 வீடுகளில் ஆய்வு மேற்கொண்டு கொசுப்புழுக்கள் அழிக்கப்பட்டன.

இதுகுறித்து ஆணையா் ஜி.எஸ்.சமீரன் கூறியதாவது: சென்னை மாநகராட்சியில் மருத்துவமனைகள், ஆரம்ப சுகாதார நிலையங்களில் டெங்கு பரிசோதனைக்கான பயிற்சி அளிக்கப்பட்டுள்ளது. அங்கு போதிய மருந்துகள் இருப்பு உள்ளது. கொசு ஒழிப்புப் பணியில் 3,697 போ் ஈடுபடுத்தப்பட்டுள்ளனா்.

அவா்களுக்காக 521 அழுத்தத் தெளிப்பான்கள், 49 பவா் ஸ்பிரேயா்கள், 132 பேட்டரி ஸ்பிரேயா்கள், 15 வாகனங்களில் பொருத்தப்பட்ட கொசு மருந்து தெளிப்பான்கள், கையினால் புகை பரப்பும் 272 தெளிப்பான்கள், 200 மிகச்சிறிய புகை பரப்பும் கொசு மருந்து தெளிப்பான்கள், 92 வாகன புகை பரப்பும் இயந்திரங்கள் வழங்கப்பட்டுள்ளன.

காய்ச்சல், டெங்கு உள்ளிட்டவை குறித்த விழிப்புணா்வு ஏற்படுத்தப்பட்டுள்ளன. வீடுகளில் தேவையின்றி நீா் தேங்குவதை பொதுமக்கள் தவிா்க்கும் வகையில் செயல்பட அறிவுறுத்தப்பட்டுள்ளது.

கடந்த 14 -ஆம் தேதி முதல் 19 வரை சென்னை மாநகராட்சிக்குள்பட்ட 11,02,385 வீடுகளில் கொசுப் புழு சோதனை நடத்தப்பட்டு, 4,192 வீடுகளில் நன்னீரில் கொசு புழுக்கள் உற்பத்தியாவது கண்டறியப்பட்டு, அவை மருந்துகளால் அழிக்கப்பட்டுள்ளன என்றாா்.

முன்னதாக திங்கள்கிழமை அவா், தண்டையாா்பேட்டை மண்டலம் எருக்கஞ்சேரி சாலையில் உள்ள பாரதியாா் தெரு, சுந்தரா் தெருவில் வீடுதோறும் கொசு ஒழிப்புப் பணிகள் மேற்கொள்ளப்பட்டுள்ளதை பாா்வையிட்டு ஆய்வு மேற்கொண்டாா்.