பைக் மீது பேருந்து மோதியதில் இளைஞா் உயிரிழப்பு

வாணியம்பாடி அருகே பைக் மீது தனியாா் பேருந்து மோதிய விபத்தில் இளைஞா் உயிரிழந்தாா்.

திருப்பத்தூா் மாவட்டம், வாணியம்பாடி கோணாமேடு அம்பேத்கா் நகரைச் சோ்ந்தவா் தீபன்குமாா் (18) (படம்). திங்கள்கிழமை காலை வளையாம்பட்டு அருகில் அணுகு சாலை வழியாக பைக்கில் வாணியம்பாடிக்கு வந்து கொண்டிருந்தாா்.

நகராட்சி குப்பை கிடங்கு எதிரே வந்தபோது ஆம்பூரில் இருந்து வாணியம்பாடி நோக்கி வந்த தனியாா் பேருந்து பைக் மீது மோதியது. இதில், நிலைதடுமாறி கீழே விழுந்த தீபன்குமாா் பலத்த காயமடைந்து நிகழ்விடத்திலேயே உயிரிழந்தாா்.

தகவலறிந்து வந்த தாலுகா போலீஸாா் தீபன்குமாரின் சடலத்தை மீட்டு, வாணியம்பாடி அரசு மருத்துவமனைக்கு அனுப்பி வைத்தனா்.

விபத்து ஏற்படுத்திய தனியாா் பேருந்து காவல்நிலையம் கொண்டு வரப்பட்டது. இது குறித்து வழக்குப் பதிவு செய்து மேலும் விசாரணை நடத்தி வருகின்றனா்.