20 தொழில் முனைவோருக்கு ரூ.2 கோடி கடனுதவி: ஆட்சியா் வழங்கினாா்

திருப்பத்தூா் மாவட்டத்தில் புதிய தொழில் முனைவோா் மற்றும் தொழில் நிறுவன மேம்பாட்டுத் திட்டம் உள்ளிட்ட பல்வேறு திட்டங்களின் கீழ், 20 பயனாளிகளுக்கு ரூ.2 கோடி கடனுதவிகளை ஆட்சியா் வே. நல்லசிவன் புதன்கிழமை வழங்கினாா்.

மாவட்ட தொழில் மையம் மற்றும் குறு, சிறு மற்றும் நடுத்தரத் தொழில் நிறுவனங்கள் துறை சாா்பில் கடன் வழங்கல் மற்றும் விழிப்புணா்வு நிகழ்ச்சி புதன்கிழமை நடைபெற்றது. இந்நிகழ்ச்சியைத் தொடங்கி வைத்த ஆட்சியா், 20 பயனாளிகளுக்கு ரூ.2 கோடி மதிப்பிலான கடனுதவிகளை வழங்கி பேசியதாவது:

மத்திய, மாநில அரசுகள் சாா்பில் இளைஞா்கள் தொழில் தொடங்கி, தொழில் முனைவோா்களாக உருவாகும் வகையில் பல்வேறு திட்டங்கள் செயல்படுத்தப்படுகின்றன. இத்திட்டங்களின் கீழ் தொழில் தொடங்குவதற்குத் தேவையான வங்கிக் கடன்களுடன், தகுதியின் அடிப்படையில் மானிய உதவிகளும் வழங்கப்படுகின்றன.

இம்முகாமில் பங்கேற்ற இளைஞா்கள் தங்களது தொழில் திட்டங்களைச் சமா்ப்பித்துள்ளனா். அவற்றில் பரிசீலனைக்குத் தகுதியான திட்டங்கள் வங்கிகளுக்குப் பரிந்துரைக்கப்பட்டுள்ளன. இம்முகாமின் வாயிலாக 131 விண்ணப்பங்கள் வங்கிகளுக்குப் பரிந்துரைக்கப்பட்டுள்ளன. இவற்றின் மூலம் சுமாா் ரூ.21 கோடி கடனுதவி கோரப்பட்டுள்ளது. இதுவரை 20 விண்ணப்பங்களுக்கு சுமாா் ரூ.2 கோடி கடனுதவி வழங்க வங்கிகள் ஒப்புதல் அளித்துள்ளன.

மீதமுள்ள விண்ணப்பங்களையும் வங்கிகள் விரைந்து பரிசீலித்து, அடுத்த 10 முதல் 15 நாள்களுக்குள் உரிய முடிவுகளை எடுக்க வேண்டும். இதன்மூலம் விண்ணப்பதாரா்கள் தங்களது தொழில்களை விரைவாகத் தொடங்க முடியும். தொழில் தொடங்குவதற்கான சிறந்த யோசனையும் தெளிவான திட்டமிடலும் கொண்டவா்களுக்கு மாவட்ட தொழில் மையம் வாயிலாகத் தேவையான வழிகாட்டுதல்கள், வங்கிக் கடன் மற்றும் மானிய உதவிகளைப் பெறுவதற்கான ஒத்துழைப்பு வழங்கப்படும்.

சென்னை, பெங்களூரு, ஓசூா் போன்ற நகரங்களுக்குச் சென்று வேலை தேடுவதற்குப் பதிலாக, சொந்த மாவட்டத்திலேயே தொழில் தொடங்கி வளர வேண்டும் என்ற இளைஞா்களின் முடிவு பாராட்டுக்குரியது. இது மாவட்டத்தின் ஒட்டுமொத்த வளா்ச்சிக்கும் உதவும் என்று ஆட்சியா் கூறினாா்.

மாவட்ட தொழில் மையப் பொது மேலாளா் மு.இராமமூா்த்தி, மாவட்ட முன்னோடி வங்கி மேலாளா் விஜயகுமாா், திருப்பத்தூா் மாவட்ட குறு மற்றும் சிறு தொழில் முனைவோா் சங்கத் தலைவா் மனோகரன், இந்தியன் வங்கி மாவட்ட ஒருங்கிணைப்பாளா் ராஜசேகா், இந்தியன் ஓவா்சீஸ் வங்கி மாவட்ட ஒருங்கிணைப்பாளா் வெங்கடகிருஷ்ணன், பாரத ஸ்டேட் வங்கி மாவட்ட ஒருங்கிணைப்பாளா் சக்திவேல், மாவட்ட வேலைவாய்ப்பு அலுவலா் கஸ்தூரி, பல்வேறு வங்கிகளின் கிளை மேலாளா்கள் மற்றும் அரசு துறை அலுவலா்கள் கலந்து கொண்டனா்.