விவசாயிகள் சங்கத்தினா் சாலை மறியல்: 200 போ் கைது

தோ்தல் வாக்குறுதிபடி தவெக அரசு கூட்டுறவு பயிா் கடன்களை முழுமையாக தள்ளுபடி செய்யக்கோரி திருவள்ளூா் மாவட்டத்தில் 5 இடங்களில் புதன்கிழமை நடைபெற்ற சாலை மறியல் போராட்டத்தில் ஈடுபட்ட தமிழ்நாடு விவசாயிகள் சங்கத்தினா் 200 பேரை போலீஸாா் கைது செய்தனா்.

திருவள்ளூா் அருகே விஷ்ணுவாக்கம் கிராமத்தில் நடைபெற்ற சாலை மறியல் போராட்டத்திற்கு மாவட்ட தலைவா் ஆா்.தமிழ்அரசு தலைமை வகித்தாா். இதில் அந்தப் பகுதி செயலாளா் எஸ்.கலையரசன், செயலாளா் கே.முருகன் மற்றும் பொருளாளா் விஜயகுமாா் ஆகியோா் முன்னிலை வகித்தனா். அப்போது, தோ்தலில் அளித்த வாக்குறுதிப்படி விவசாயிகள் பெற்ற பயிா் கடன் தொகைக்கு ஏற்ப தள்ளுபடி செய்வதை தவிா்த்து முழுமையாக தள்ளுபடி செய்யக்கோரி போராட்டத்தில் ஈடுபட்டனா். மேலும் விலை உயா்வை குறைக்க அனைத்து பொருள்களும் நியாய விலை கடைகள் மூலம் மலிவு விலையில் பொருள்களை வழங்க வேண்டும். வீடுகளில் பொருத்தப்படும் ஸ்மாா்ட் மீட்டா் திட்டத்தை ரத்து செய்தல் உள்ளிட்ட பல்வேறு கோரிக்கைகளை வலியுறுத்தி சாலை மறியல் போராட்டத்தில் ஈடுபட்டனா். அதைத்தொடா்ந்து செங்குன்றம்-திருவள்ளூா் சாலையில் மறியல் போராட்டத்தில் ஈடுபட்ட 30பேரை அப்பகுதியில் பாதுகாப்பு பணியில் ஈடுபட்டிருந்த போலீஸாா் கைது செய்தனா்.

இதேபோல், கும்மிடிப்பூண்டியில்-62, ஊத்துக்கோட்டை அருகே தண்டலத்தில்-25, சோழவரம் ஒன்றியம் அருமந்தை கூட்டுச் சாலையில்-20 பேரும் என மொத்தம் 207 போ் கைது செய்து அந்தந்த பகுதிகளில் தனியாா் திருமண அரங்குகளில் அடைத்து வைத்தனா். அதையடுத்து மாலையில் விடுவிக்கப்பட்டனா்.

திருத்தணியில்...

தமிழ்நாடு விவசாயிகள் சங்கம் சாா்பில் திருத்தணி அடுத்த கே.ஜி.கண்டிகையில் புதன்கிழமை காலை 10 மணியளவில் மாநிலம் தழுவிய சாலை மறியல் போராட்டம் நடைபெற்றது. போராட்டத்துக்கு தமிழ்நாடு விவசாயிகள் சங்க மாவட்டப் பொருளாளா் என். ஸ்ரீநாத் தலைமை வகித்தாா். திருத்தணி பகுதி பொருளாளா் நேதாஜி, ஆா்.கே.பேட்டை பகுதி தலைவா் வி.எம். அருளப்பன் உள்ளிட்ட நிா்வாகிகள் முன்னிலை வகித்தனா்.

சாலை மறியல் போராட்டத்தில் ஈடுபட்ட 60 பேரை போலீஸாா் கைது செய்தனா். நிகழ்ச்சியில் மாநிலப் பொருளாளா் ஸ்ரீ பெருமாள், மாவட்டப் பொருளாளா் வி. அந்தோணி, ஒன்றிய அமைப்பாளா் வி. பாலாஜி, சிஐடியு மாவட்டத் தலைவா் கரிமுல்லா உள்ளிட்ட பலா் கலந்து கொண்டனா்.