திண்டிவனம்- கிருஷ்ணகிரி சாலைப் பணி: தீபத் திருவிழாவுக்குள் முடிக்க பாமக வலியுறுத்தல்

திண்டிவனம்- கிருஷ்ணகிரி இடையிலான சாலைப் பணியை திருவண்ணாமலை கார்த்திகை தீபத் திருவிழாக்குள் செய்து முடிக்க வேண்டும் என்று பாமக வலியுறுத்தியது.

திருவண்ணாமலை ஒருங்கிணைந்த தெற்கு, மேற்கு மாவட்ட பாமகவின் பொதுக்குழுக் கூட்டம் திருவண்ணாமலையில் திங்கள்கிழமை நடைபெற்றது. கூட்டத்துக்கு, வன்னியர் சங்க மாநில துணைப் பொதுச் செயலாளர் இரா.காளிதாஸ் தலைமை வகித்தார்.

கூட்டத்தில், திண்டிவனத்தில் இருந்து திருவண்ணாமலை வழியாக கிருஷ்ணகிரி வரையில் போடப்படும் இருவழிச் சாலைப் பணியை கார்த்திகை தீபத் திருவிழாவுக்குள் செய்து முடிக்க வேண்டும். தமிழக சட்டப்பேரவையின் நடப்பு கூட்டத் தொடரிலேயே பூரண மதுவிலக்கை அமல்படுத்த வேண்டும் என்பன உள்ளிட்ட பல்வேறு தீர்மானங்கள் நிறைவேற்றப்பட்டன.

கூட்டத்தில், மாநிலத் துணைத் தலைவர் ச.பாண்டுரங்கன், வன்னியர் சங்க மாவட்டத் தலைவர் அ.லோகநாதன், மாவட்டச் செயலாளர் லோ.சதாசிவம் உள்ளிட்ட நிர்வாகிகள் பலர் கலந்து கொண்டனர்.