நிறுத்தப்பட்ட உதவித் தொகையை மீண்டும் வழங்கக் கோரி முதியோர்கள் மனு

நிறுத்தப்பட்ட உதவித் தொகையை மீண்டும் வழங்கக் கோரி, 300-க்கும் மேற்பட்ட முதியோர்கள் மாவட்ட ஆட்சியரிடம் திங்கள்கிழமை மனு கொடுத்தனர்.

மாவட்ட ஆட்சியர் அலுவலகத்தில் மக்கள் குறைதீர் கூட்டம் திங்கள்கிழமை நடைபெற்றது. கூட்டத்துக்கு தலைமை வகித்த ஆட்சியர் அ.ஞானசேகரன், பொதுமக்களிடம் இருந்து மனுக்களைப் பெற்று விசாரித்தார். அப்போது, கலசப்பாக்கத்தை அடுத்த கடலாடி, அதைச் சுற்றியுள்ள கிராமங்களைச் சேர்ந்த 300-க்கும் மேற்பட்டோர் ஆட்சியரைச் சந்தித்து மனு கொடுத்தனர்.

அந்த மனுவில் உதவித் தொகை பெற தகுதியான தங்களுக்கு அண்மைக்காலமாக உதவித் தொகை நிறுத்தப்பட்டுள்ளது. இதுகுறித்து அதிகாரிகளிடம் பலமுறை முறையிட்டும் நடவடிக்கை எடுக்கவில்லை. எனவே, நிறுத்தப்பட்ட உதவித் தொகையை மீண்டும் வழங்க வேண்டும் என்று தெரிவித்திருந்தனர். மனுவைப் பெற்றுக் கொண்ட ஆட்சியர், உரிய நடவடிக்கை எடுப்பதாக உறுதி அளித்தார்.

கறவை மாடு கேட்டு மனு: இதேபோல வந்தவாசி, போளூர் வட்டங்களைச் சேர்ந்த தேவிகாபுரம், மழையூர், நல்லூர் உள்ளிட்ட 17 கிராமங்களைச் சேர்ந்த இருளர் இன மக்கள் தங்களுக்கு தமிழக அரசு வழங்கும் விலையில்லா கறவை மாடுகள் வழங்கக் கோரி ஆட்சியரிடம் மனு அளித்தனர்.