விழுப்புரம்-திருப்பதி ரயிலில் அலைமோதிய பக்தர்கள் கூட்டம்

விழுப்புரத்தில் இருந்து திருவண்ணாமலை வழியாக சனிக்கிழமை திருப்பதி சென்ற ரயிலில் பக்தர்களின் கூட்டம் அலைமோதியது.

புரட்டாசி 2-ஆவது சனிக்கிழமை என்பதால் விழுப்புரம், திருவண்ணாமலை மாவட்டங்களைச் சேர்ந்த ஏராளமான பக்தர்கள் திருப்பதிக்கு செல்கின்றனர்.

அதன்படி, சனிக்கிழமை மாலை 6 மணிக்கு விழுப்புரத்தில் இருந்து திருவண்ணாமலை வழியாக திருப்பதிக்கு விரைவு ரயில் சென்றது.

இந்த ரயிலில் செல்வதற்காக திருவண்ணாமலை ரயில் நிலையத்தில் 500-க்கும் மேற்பட்டோர் பயணச் சீட்டு வாங்கி காத்திருந்தனர். ஆனால், திருக்கோயிலூர் ரயில் நிலையத்தில் இருந்தே ரயிலில் பக்தர்களின் கூட்டம் அளவுக்கு அதிகமாக இருந்தது.

மாலை 6 மணிக்கு வர வேண்டிய ரயில், 6.20 மணிக்கு திருவண்ணாமலை ரயில் நிலையம் வந்தடைந்தது.

இந்த ரயிலில் அளவுக்கு அதிகமான பக்தர்கள் கூட்டம் இருந்ததால் திருவண்ணாமலையில் பயணச் சீட்டு வாங்கி காத்திருந்தவர்களால் ரயிலில் ஏற முடியவில்லை.

பலர் முண்டியடித்துக் கொண்டும், தொங்கிக் கொண்டும் சென்றனர். பலர் பயணச் சீட்டுகளை ரத்து செய்துவிட்டு பேருந்துகளில் சென்றனர்.