சண்முகா அரசுப் பள்ளிக்கு 6 தங்கப் பதக்கங்கள்

காஞ்சிபுரத்தில் நடைபெற்ற பள்ளி மாணவ-மாணவிகளுக்கான துப்பாக்கிச் சுடுதல், பாட்டுப் போட்டி ஆகியவற்றில் திருவண்ணாமலை சண்முகா தொழிற்சாலை அரசு மேல்நிலைப் பள்ளி மாணவ-மாணவிகள் 6 தங்கப் பதக்கங்களை வென்றனர்.
காஞ்சிபுரத்தில் ஜூன் 11 முதல் 20-ஆம் தேதி வரை பள்ளி மற்றும் கல்லூரி மாணவ-மாணவிகளுக்கான துப்பாக்கிச் சுடும் போட்டிகள் நடைபெற்றன. 
இந்தப் போட்டியில், திருவண்ணாமலை சண்முகா தொழிற்சாலை அரசு மேல்நிலைப் பள்ளி மாணவ-மாணவிகள் 18 பேர் கலந்து கொண்டனர்.
தொடர்ந்து நடைபெற்ற பாட்டுப் போட்டி, குழு நடனப் போட்டிகளில் 21 பள்ளிகள், 9 கல்லூரிகளைச் சேர்ந்த மாணவ-மாணவிகள் கலந்து கொண்டனர். 
திருவண்ணாமலை சண்முகா தொழிற்சாலை அரசு மேல்நிலைப் பள்ளி சார்பில் கலந்து கொண்ட மாணவ-மாணவிகள் துப்பாக்கிச் சுடுதல், பாட்டு, குழு நடனம் ஆகியவற்றில் முதலிடம் பிடித்து 6 தங்கப் பதக்கங்களை வென்றனர்.
வெற்றி பெற்ற மாணவ-மாணவிகள், பயிற்றுவித்த பள்ளியின் தேசிய மாணவர் படை அலுவலர் விஜய் ஆனந்த் ஆகியோரை பள்ளித் தலைமை ஆசிரியர் ஒய்.ஜெயராஜ் சாமுவேல் மற்றும் ஆசிரிய-ஆசிரியைகள் பாராட்டினர்.