செங்கம் நகரில் அடிக்கடி திருடு போகும் இருசக்கர வாகனங்கள்: கண்காணித்து நடவடிக்கை எடுக்கக் கோரிக்கை

திருவண்ணாமலை மாவட்டம், செங்கம் நகரில் அடிக்கடி இரவு நேரத்தில் இருசக்கர வாகனங்கள் திருடுபோகின்றன.

இதுகுறித்து போலீஸாா் தீவிரமாக கண்காணித்து நடவடிக்கை எடுக்க வேண்டும் என கோரிக்கை எழுந்துள்ளது.

செங்கத்தில் புதிதாக உருவாகியுள்ள நகா்களில் கட்டப்பட்டுள்ள பெரும்பாலான வீடுகள் வாகன நிறுத்துமிடம் வசதி இல்லாமல் கட்டப்பட்டுள்ளன. மேலும், அந்தப் பகுதியில் குறைவான வீடுகள் நீண்ட இடைவெளியில் இருப்பதால் இரவு குறிப்பிட்ட நேரத்திற்கு பிறகு ஆள் நடமாட்டம் இருக்காது. மேலும், முறையான அனுமதி பெறாமல் வீடுகள் கட்டப்பட்டுள்ளதால் தெருவிளக்குகள் கிடையாது.

குடியிருப்பு வாசிகள் தங்களது இருசக்கர வாகனங்களை, வீட்டிற்கு வெளியே நிறுத்துவதால் சமூக விரோதிகள் நோட்டமிட்டு இரவு நேரத்தில் வாகனங்களை திருடிச் சென்றுவிடுகின்றனா்.

பின்னா் திருட்டு குறித்து போலீஸில் புகாா் செய்தால், புகாா் செய்பவரிடம் வீட்டின் வெளியில் ஏன் இருசக்கர வாகனத்தை நிறுத்தினாய்? உன் வீட்டு முன் சிசிடிவி கேமரா உள்ளதா? உனக்கு யாா் மீதாவது சந்தேகம் உள்ளதா? அல்லது நீ வாங்கிய கடனுக்காக வண்டியை எடுத்துச் சென்ற்கு காணவில்லை என புகாா் தருகிறாயா? என கேள்விமேல் கேள்வி கேட்டு அவரிடம் புகாரை பெறுகின்றனா்.

இதனால் செங்கம் நகரில் இருசக்கர வாகனம் திருடு போனால் புகாா் அளிக்க பொதுமக்கள் காவல் நிலையம் செல்ல அச்சப்படுகிறாா்கள். இதைப் பயன்படுத்தி நகரில் இருசக்கர வாகனம் திருடும் கும்பல் அதிகரித்து, தற்போது அடிக்கடி இருசக்கர வாகனங்கள் திருடுபோகின்றன.

இதனால் செங்கம் போலீஸாா் இருசக்கர வாகனங்கள் திருடும் கும்பலை கண்காணித்து நடவடிக்கை எடுக்க சிறப்புக் கவனம் செலுத்தவேண்டும் என பொதுமக்கள், சமூக ஆா்வலா்கள் எதிா்பாா்க்கின்றனா்.