ஜப்தி செய்வதாக வந்த தகவலால் ஆட்சியர் அலுவலகத்தில் பரபரப்பு

அரசு வாகனங்களை ஜப்தி செய்யப் போவதாகத் தகவல் பரவியதை அடுத்து, மாவட்ட ஆட்சியர் அலுவலகத்தில் நின்ற அரசு வாகனங்கள் அவசர அவசரமாக அப்புறப்படுத்தப்பட்டன.

ஆதிதிராவிடர் நலத்துரை சார்பில் கடந்த சில ஆண்டுகளுக்கு முன்பு குடியாத்தம் அருகே சிலரின் நிலம் கையகப்படுத்தப்பட்டது. இதற்கு குறைந்த இழப்பீடு வழங்கப்பட்டதாகத் தொடரப்பட்ட வழக்கில் நீதிமன்றம் கூடுதல் இழப்பீடு வழங்க உத்தரவிட்டது.

இந்த உத்தரவை பின்பற்றி தொடர்புடைய துறை அதிகாரிகள் இழப்பீடு வழங்காத நிலையில், கடந்த மாதம் ஆட்சியர் அலுவலகத்தில் நின்ற செய்தி மக்கள் தொடர்பு அலுவலர் வாகனத்தை ஜப்தி செய்ய நீதிமன்ற ஊழியர் துணையுடன் வழக்குரைஞர் முயற்சி மேற்கொண்டார். அதையடுத்து ஆதிதிராவிடர் நலத் துறையில் காலஅவகாசம் கோரியதை அடுத்து ஜப்தி கைவிடப்பட்டது.

இதேபோல், வேறொரு வழக்கில் இழப்பீடு வழங்காததை அடுத்து அரசு வாகனங்களை ஜப்தி செய்ய நீதிமன்ற ஊழியர், வாதியின் வழக்குரைஞர் வருவதாக திங்கள்கிழமை காலை தகவல் பரவியது.

இதையடுத்து, மாவட்ட ஆட்சியர் அலுவலக வளாகத்தில் நிறுத்தப்பட்டிருந்த ஆட்சியர் கார் உள்பட அதிகாரிகளின் வாகனங்கள் அனைத்தும் உடனடியாக அப்புறப்படுத்தப்பட்டன. இதனால் சிறிதுநேரம் பரபரப்பு காணப்பட்டது.