வால்பாறை அருகே 15 கிலோ சந்தனக் கட்டை பறிமுதல்

சந்தனக் கட்டை திருட்டு கும்பல் தப்பியோடிய நிலையில், 15 கிலோ சந்தனக் கட்டையை வனத் துறையினர் கைப்பற்றியுள்ளனர்.

வால்பாறை வனச்சரக அலுவலர் சரவணன் உத்தரவின்பேரில் வனவர் சந்திரன் தலைமையில் வனத் துறையினர் ஞாயிற்றுக்கிழமை இரவு அட்டகட்டி வனப்பகுதியில் தீவிர ரோந்து பணியில் ஈடுபட்டனர். அப்போது,  திங்கள்கிழமை அதிகாலை அட்டகட்டி மின் வாரியப் பணியாளர்கள் குடியிருப்பு அருகில் மரம் வெட்டும் சத்தம் கேட்டு, வனத் துறையினர் அங்கு சென்றபோது, அவர்களைப் பார்த்த 4 பேர் அங்கிருந்து தப்பிச் சென்றனர். வனத்துறையினர் அப்பகுதியில் தேடுதல் வேட்டையில் ஈடுபட்டனர்.

அப்போது, சந்தன மரத்தை வெட்டி, அதிலிருந்து 15 கிலோ சந்தனகட்டையைச் செதுக்கி, அதை கடத்திச் செல்ல தயார் நிலையில் வைக்கப்பட்டிருப்பது தெரியவந்தது. அதை வனத்துறையினர் கைப்பற்றினர். சந்தனக் கட்டை திருட்டுக் கும்பலை வனத்துறையினர் தேடி வருகின்றனர்.