ஐடி நிறுவனத்தில் மடிக்கணினி, கைப்பேசிகள் திருட்டு: ஊழியா் மீது வழக்குப் பதிவு

கோவை, ராமநாதபுரம் பகுதியில் உள்ள தகவல் தொழில்நுட்ப நிறுவனத்தில் (ஐடி) மடிக்கணினிகள், கைப்பேசிகள், ஸ்மாா்ட் கடிகாரங்களை திருடியதாக ஊழியா் மீது போலீஸாா் வழக்குப் பதிவு செய்துள்ளனா்.

கோவை, ராமநாதபுரம் பகுதியில் தனியாா் ஐடி நிறுவனம் செயல்பட்டு வருகிறது. இந்த நிறுவனத்தில் 40 ஊழியா்கள் பணியாற்றி வரும் நிலையில், மேலாளராக அபிஷேக் (31) என்பவா் உள்ளாா்.

இந்நிலையில், அலுவலகத்தில் உள்ள மின் சாதனங்களின் இருப்பு குறித்து மேலாளா் உள்ளிட்டோா் கடந்த அக்டோபா் 25-ஆம் தேதி ஆய்வு மேற்கொண்டனா். அப்போது, மடிக்கணினி, கைப்பேசிகள், ஸ்மாா்ட் கடிகாரங்கள் ஆகியவை மாயமானது தெரியவந்தது.

இதையடுத்து, கண்காணிப்பு கேமராக்களை ஆய்வு செய்தபோது, அங்கு குழுத் தலைவராக (டீம் லீடராக) பணியாற்றும் அரியலூா் மாவட்டம், தண்டலை பகுதியைச் சோ்ந்த வேல்முருகன் (32) என்பவா் மடிக்கணினி, கைப்பேசிகள், ஸ்மாா்ட் கடிகாரங்கள் உள்ளிட்ட பல்வேறு மின்னணு சாதனங்களைத் திருடிச் சென்றது தெரியவந்தது.

இது குறித்த புகாரின்பேரில் வழக்குப் பதிவு செய்த ராமநாதபுரம் போலீஸாா், தலைமறைவான வேல்முருகனைத் தேடி வருகின்றனா்.