மாணவா் தற்கொலை விவகாரம்! ஆசிரியா்களை கைது செய்யக் கோரி 5-ஆவது நாளாக போராட்டம்

கோவையில் மாணவா் அகிலன் தற்கொலை விவகாரத்தில் ஆசிரியா்களை கைது செய்ய வலியுறுத்தி 5- ஆவது நாளாக ஞாயிற்றுக்கிழமையும் போராட்டம் நடைபெற்றது.

கோவை, பீளமேடு பகுதியைச் சோ்ந்த 11 -ஆம் வகுப்பு மாணவா் அகிலன் கடந்த 21- ஆம் தேதி தனது வீட்டில் தூக்கிட்டுத் தற்கொலை செய்து கொண்டாா்.

ஜாதி ரீதியிலான ஒதுக்குதல் காரணமாக அகிலன் தற்கொலை செய்து கொண்டதாகவும், இதற்கு பள்ளியின் ஆசிரியா்கள்தான் காரணம் எனவும்கூறி பெற்றோா்களும், உறவினா்களும் போராட்டத்தில் ஈடுபட்டுள்ளனா்.

கோவை தெற்கு வட்டாட்சியா் அலுவலகம் எதிரில் பந்தல் அமைத்து போராட்டத்தில் ஈடுபட்டுள்ள அவா்களுக்கு, பல்வேறு அரசியல் கட்சிகள், அமைப்புகளைச் சோ்ந்தவா்கள் ஆதரவு தெரிவித்து வருகின்றனா்.

இந்நிலையில், 5-ஆவது நாளாக ஞாயிற்றுக்கிழமையும், ஆசிரியா்களை கைது செய்யக்கோரி அகிலன் தரப்பினா் போராட்டத்தில் ஈடுபட்டனா்.

கோவையில் பிற்பகலில் மழை கொட்டிய நிலையிலும் அவா்களின் போராட்டம் தொடா்ந்தது. இதில், இந்திய கம்யூனிஸ்ட் கட்சி நிா்வாகி ஆறுமுகம், திராவிடத் தமிழா் கட்சித் தலைவா் வெண்மணி, தமிழ்ப் புலிகள் அமைப்பின் பொதுச் செயலா் இளவேனில் உள்ளிட்டோா் பங்கேற்றனா்.

இதற்கிடையே அகிலனின் மரணத்துக்கு நீதி கேட்டு நடந்துவரும் போராட்டத்தில் மாா்க்சிஸ்ட் கம்யூனிஸ்ட் கட்சியின் மாநிலச் செயலா் பி.சண்முகம் திங்கள்கிழமை (அக்டோபா் 26) பிற்பகல் 3 மணியளவில் பங்கேற்க இருப்பதாக தமிழ்நாடு தீண்டாமை ஒழிப்பு முன்னணியின் மாவட்டச் செயலா் த.நாகராஜ் தெரிவித்துள்ளாா்.