சிங்கம்பேட்டையில் பேருந்துகளை மறித்து பொதுமக்கள் போராட்டம்

பவானியை அடுத்த சிங்கம்பேட்டை பேருந்து நிறுத்தத்தில் அனைத்துப் பேருந்துகளும் நின்று செல்ல வேண்டும் எனக் கோரி பொதுமக்கள் வெள்ளிக்கிழமை போராட்டத்தில் ஈடுபட்டனர்.

 பவானி - மேட்டூர் சாலையில் சிங்கம்பேட்டை கேட் எனும் பேருந்து நிறுத்தம் உள்ளது. இந்த பேருந்து நிறுத்தத்தில் ஈரோடு, மேட்டூர் செல்வதற்காக சுற்று வட்டார கிராம மக்கள் வந்து செல்வது வழக்கம். இந்த நிறுத்த்தில் பெரும்பாலான பேருந்துகள் நின்று செல்வதில்லை எனக் கூறப்படுகிறது.

 இதனால், வெள்ளிக்கிழமை 100-க்கும் மேற்பட்ட பொதுமக்கள் சிங்கம்பேட்டை கேட் பேருந்து நிறுத்தத்தில் அனைத்துப் பேருந்துகளும் நின்று செல்ல வலியுறுத்தி அரசு,  தனியார் பேருந்துகளை மறித்துப் போராட்டத்தில் ஈடுபட்டனர்.  இதுகுறித்து, தகவலறிந்த அம்மாபேட்டை போலீஸார் அப்பகுதிக்குச் சென்று பொதுமக்களிடம் பேச்சு வார்த்தை நடத்தினர். அதில், காவல் துணைக் கண்காணிப்பாளர் முன்னிலையில் பேச்சுவார்த்தை நடத்தி தீர்வு காணலாம் எனத் தெரிவிக்கப்பட்டதையடுத்து போராட்டம் கைவிடப்பட்டது.