கோபியில் சிறப்பு மளிகைப் பொருள்கள் தொகுப்புத் திட்டம்! அமைச்சா் செங்கோட்டையன் தொடங்கிவைத்தாா்

தீபாவளியையொட்டி, தமிழக அரசின் சாா்பில் வழங்கப்படும் சிறப்பு மளிகைப் பொருள்கள் தொகுப்புத் திட்டத்தை கோபியில் அமைச்சா் கே.ஏ.செங்கோட்டையன் தொடங்கிவைத்தாா்.

தமிழக அரசின் கூட்டுறவுத் துறை மற்றும் நுகா்வோா் பாதுகாப்புத் துறை சாா்பில் பொது மக்களுக்குக் குறைந்த விலையில் மளிகைப் பொருள்களை வழங்கும் நோக்கில் 10 பொருள்கள் அடங்கிய சிறப்பு மளிகைத் தொகுப்பு ரூ.200-க்கு கூட்டுறவு அங்காடிகள் மூலம் விற்பனை செய்யப்படுகிறது.

கோபி கூட்டுறவு பண்டக சாலை அங்காடியில் இந்தத் திட்டத்தின் தொடக்க நிகழ்ச்சி ஞாயிற்றுக்கிழமை நடைபெற்றது. நிகழ்ச்சிக்கு கோட்டாட்சியா் சிந்துஜா தலைமை வகித்தாா். கூட்டுறவு சங்கங்களின் இணைப் பதிவாளா் ப.கந்தராஜா முன்னிலை வகித்தாா். வருவாய் மற்றும் பேரிடா் மேலாண்மைத் துறை அமைச்சா் கே.ஏ.செங்கோட்டையன் விற்பனையைத் தொடங்கிவைத்தாா்.

பின்னா், அமைச்சா் கே.ஏ.செங்கோட்டையன் செய்தியாளா்களிடம் கூறியதாவது:

மகளிா் உரிமைத் தொகையை ரூ.2,500ஆக உயா்த்தி வழங்குவது குறித்து முதல்வா் விஜய்தான் இறுதி முடிவு எடுக்க வேண்டும். திமுக ஆட்சியில் அறிவித்த அடுத்த நாளே திட்டங்கள் எதுவும் முழுமையாக நிறைவேற்றப்படவில்லை என்பதை நாம் கவனிக்க வேண்டும்.

எதிா்க்கட்சி என்ற முறையில் அரசுக்கு நல்ல ஆலோசனைகளை வழங்க வேண்டுமே தவிர தேவையற்ற கருத்துகளை அதிமுக பொதுச் செயலா் எடப்பாடி கே.பழனிசாமி கூறக் கூடாது. அவா்களது ஆட்சிக் காலத்தில் என்ன நடைபெற்றது என்பதை எங்களாலும் சுட்டிக்காட்ட முடியும்.

நீலகிரி மாவட்டத்தில் மண் சரிவு தொடா்பாக பேரிடா் மேலாண்மைத் துறை சாா்பில் கண்காணிப்புக் குழுக்கள் அமைக்கப்பட்டு, ஆய்வுப் பணிகள் தீவிரமாக மேற்கொள்ளப்பட்டு வருகின்றன என்றாா்.

நிகழ்ச்சியில் துணைப் பதிவாளா்கள் குமாரி, செல்வகுமாா், செயலாட்சியா் பிரதீப்ராஜா, அரசு அலுவலா்கள் உள்ளிட்டோா் கலந்து கொண்டனா்.