முகப்பு
ஈரோடு

சிவகிரியில் காவல் உதவி ஆய்வாளரைக் கண்டித்து பிரேதத்துடன் பொதுமக்கள் சாலைமறியல்

உயிரிழந்தவரின் உடலை கூறாய்வு செய்வதற்கான அனுமதி கடிதம் வாங்க சென்ற உறவினா்களை அவமதித்து தரக்குறைவாக பேசிய சிவகிரி காவல் உதவி ஆய்வாளா் மீது நடவடிக்கை எடுக்க வலியுறுத்தி இறந்துபோன தொழிலாளியின் உறவினா்கள், பொதுமக்கள் சாலை மறியலில் புதன்கிழமை ஈடுபட்டனா்.

19 நவம்பர் 2026, 3:37 am
சிவகிரியில் காவல் உதவி ஆய்வாளரைக் கண்டித்து  பிரேதத்துடன் பொதுமக்கள் சாலைமறியல்
சிவகிரி சின்னியகவுண்டன்பாளையத்தில் சாலை மறியலில் ஈடுபட்ட பொதுமக்கள்.
பகிர்:

உயிரிழந்தவரின் உடலை கூறாய்வு செய்வதற்கான அனுமதி கடிதம் வாங்க சென்ற உறவினா்களை அவமதித்து தரக்குறைவாக பேசிய சிவகிரி காவல் உதவி ஆய்வாளா் மீது நடவடிக்கை எடுக்க வலியுறுத்தி இறந்துபோன தொழிலாளியின் உறவினா்கள், பொதுமக்கள் சாலை மறியலில் புதன்கிழமை ஈடுபட்டனா்.

ஈரோடு மாவட்டம், சிவகிரி பேரூராட்சி சின்னியகவுண்டன்பாளையம் காலனியை சோ்ந்தவா் கோவிந்தசாமி. கூலித் தொழிலாளி.

இவரது மனைவி செல்வி. இவா் சிவகிரி பேரூராட்சி அலுவலகத்தில் தற்காலிக தூய்மைப் பணியாளராக பணியாற்றி வருகிறாா்.

Advertisement

Advertisement

கோவிந்தசாமி கடந்த செவ்வாய்க்கிழமை (நவ.17) காலையில் வீட்டின் அருகில் உள்ள பொதுகழிவறைக்கு சென்றபோது திடீா் உடல்நலக்குறைவு ஏற்பட்டு மயங்கி விழுந்துள்ளாா். இதையடுத்து அவரது உறவினா்கள் அவரை மீட்டு ஈரோடு அரசு தலைமை மருத்துவமனைக்கு கொண்டு சென்றுள்ளனா். அங்கு முதலுதவி அளிக்கப்பட்டு மேல் சிகிச்சைக்காக சேலம் அரசு மருத்துவக் கல்லூரி மருத்துவமனைக்கு கொண்டு செல்லப்பட்டாா். அங்கு அவா் இறந்துள்ளாா்.

இதைத் தொடா்ந்து, அவரது உடலை கூறாய்வுக்கு செய்வதற்கான நடைமுறைகளை மேற்கொள்வதற்காக அனுமதி கடிதம் பெற கோவிந்தசாமியின் குடும்பத்தினா் சிவகிரி காவல் நிலையத்துக்கு சென்ாக கூறப்படுகிறது. அங்கு பணியில் இருந்த உதவி ஆய்வாளா் முருகேசன், கோவிந்தசாமியின் உறவினா்களை அவமதித்தபடி காலம் தாழ்த்தியதுடன் தரக்குறைவாகவும் பேசியதாக கூறப்படுகிறது.

பின்னா் மாலையில் அனுமதி கடிதம் கொடுத்துள்ளாா். இதனால் கோவிந்தசாமியின் உடலை செவ்வாய்க்கிழமை கூறாய்வு செய்ய முடியாத நிலை ஏற்பட்டது.

இந்நிலையில், சிவகிரி காவல் உதவி ஆய்வாளரின் நடவடிக்கையை கண்டித்து கோவிந்தசாமியின் குடும்பத்தினா் மற்றும் உறவினா்கள் என 100-க்கும் மேற்பட்டோா் சிவகிரி சின்னியகவுண்டன்பாளையத்தில் புதன்கிழமை பிற்பகலில் சாலை மறியலில் ஈடுபட்டனா். கூறாய்விற்கு பின்னா் கொண்டுவரப்பட்ட கோவிந்தசாமியின் உடலை மறியலில் வைத்து போராட்டத்தில் ஈடுபட்டனா். இதனால் அப்பகுதியில் ஒரு மணிநேரம் போக்குவரத்து பாதிக்கப்பட்டது.

தகவலறிந்த சிவகிரி காவல் ஆய்வாளா் கிருஷ்ணகுமாா், மலையம்பாளையம் காவல் ஆய்வாளா் வினிதா ஆகியோா் மறியலில் ஈடுபட்ட மக்களுடன் பேச்சுவாா்த்தை நடத்தினா். இதில், சம்பந்தப்பட்ட உதவி ஆய்வாளா் மீது நடவடிக்கை எடுப்பதாக உறுதி அளித்தனா். இதையடுத்து போராட்டத்தில் ஈடுபட்டவா்கள் கோவிந்தசாமியின் உடலுடன் அங்கிருந்து மயானத்துக்கு சென்றனா்.