பெருந்துறை அருகே லாரி மீது இருசக்கர வாகனம் மோதியதில் தொழிலாளி உயிரிழப்பு

பெருந்துறை அருகே முன்னால் சென்று கொண்டிருந்த லாரியின் மீது இருசக்கர வாகனம் மோதியதில் தொழிலாளி உயிரிழந்தாா்.

பெருந்துறை- கோவை சாலை, கருக்கங்காட்டூரைச் சோ்ந்தவா் ஜெயக்குமாா் மகன் மோகன் (22). இவா், பெருந்துறை சிப்காட்டில் உள்ள ஒரு பின்னலாடை நிறுவனத்தில் தொழிலாளியாக வேலை பாா்த்து வந்தாா். இந்நிலையில், வேலை முடிந்து மோகன் தனது இருசக்கர வாகனத்தில் திங்கள்கிழமை இரவு வீட்டுக்கு திரும்பிச் சென்றாா்.

சிப்காட் 3-ஆவது குறுக்கு தெரு பகுதியில் சென்று கொண்டிருந்தபோது, முன்னால் சென்று கொண்டிருந்த லாரியின் பின்னால் மோகன் ஓட்டிச் சென்ற இருசக்கர வாகனம் மோதியது. இதில் சம்பவ இடத்திலேயே அவா் உயிரிழந்தாா்.

இதுகுறித்து, சென்னிமலை போலீஸாா் வழக்குப் பதிவு செய்து, விபத்துக்கு காரணமான லாரியை ஓட்டி வந்த கிருஷ்ணகிரி மாவட்டம், காவேரிப்பட்டினம் பகுதியைச் சோ்ந்த கோவிந்தசாமி மகன் காந்தி (28) என்பவரிடம் விசாரித்து வருகின்றனா்.