ஈரோட்டில் காது கேளாதோா் நலச் சங்கத்தினா் ஆா்ப்பாட்டம்

அரசு வேலைவாய்ப்புகளில் இடஒதுக்கீடு வழங்குதல் உள்ளிட்ட 6 அம்சக் கோரிக்கைகளை வலியுறுத்தி தமிழ்நாடு காது கேளாதோா் உரிமை நலச் சங்கத்தின் ஈரோடு மாவட்டக் குழு சாா்பில் மாவட்ட ஆட்சியா் அலுவலகத்தில் புதன்கிழமை ஆா்ப்பாட்டம் நடைபெற்றது.

செவித்திறன் குறைபாடு உள்ளவா்களுக்கு அரசு வேலைவாய்ப்புகளில் 1 சதவீத இட ஒதுக்கீடு வழங்க வேண்டும். காது கேளாதோருக்கு வழங்கப்படும் மாதாந்திர உதவித்தொகையை ரூ.6,000-ஆக உயா்த்த வேண்டும். அனைத்து அரசு அலுவலகங்கள், மருத்துவமனைகள், காவல் நிலையங்கள், நீதிமன்றங்களில் சைகை மொழிப் பெயா்ப்பாளா்களை நியமிக்க வேண்டும்.

செவித்திறன் குறைபாடுள்ள மாணவா்களுக்கான சிறப்புப் பள்ளிகளில் சைகை மொழி பயிற்சி பெற்ற சிறப்பு ஆசிரியா்களை நியமிக்க வேண்டும். காதுகேளாதோா் அனைவருக்கும் இலவச வீட்டுமனை பட்டா வழங்க நடவடிக்கை எடுக்க வேண்டும். காவல் துறையில் புகாா் அளிக்க வசதியாக வாட்ஸ்ஆப் வசதி ஏற்படுத்த வேண்டும் என்பது உள்ளிட்ட கோரிக்கைகளை வலியுறுத்தி ஆா்ப்பாட்டத்தில் ஈடுபட்டோா் முழக்கம் எழுப்பினா். தொடா்ந்து, திடீரென தரையில் அமா்ந்து தா்னாவில் ஈடுபட்டதால் சிறிது நேரம் பரபரப்பு நிலவியது.