அருள்முருகன் கல்லூரியில் இயந்திரவியல் கருத்தரங்கம்

தென்னிலை அருள்முருகன் பொறியியல் கல்லூரியில் இயந்திரவியல் தொடர்பான ஒரு நாள் கருத்தரங்கம் வெள்ளிக்கிழமை நடைபெற்றது.

 கல்லூரித் தாளாளர் பி.வி.கந்தசாமி தலைமை வகித்தார். கல்லூரித் தலைவர் வி.சந்திரசேகரன், முதல்வர் டி.கார்த்திகேயன் ஆகியோர் முன்னிலை வகித்தனர்.

சேலம் நாலெட்ஜ் இன்ஸ்ட்டிடியூட் ஆஃப் டெக்னாலஜி துணை முதல்வர் கே.விசாகவேல் சிறப்பு விருந்தினராகப் பங்கேற்று கருத்தரங்கைத் துவக்கி வைத்தார்.

நிகழ்ச்சியில், 40 கல்லூரிகளைச் சேர்ந்த 120 மாணவர்கள் புதிய கண்டுபிடிப்புகள் குறித்த தங்களது கட்டுரைகளைச் சமர்ப்பித்தனர்.

செட்டிநாடு பொறியியல் கல்லூரி பேராசிரியர் வி.ஹரிபிரசாத், என்.எஸ்.என். பொறியியல் கல்லூரி பேராசிரியர் எம்.உமாசங்கர் ஆகியோர் நடுவர்களாக இருந்து சிறந்த மாணவர்களைத் தேர்ந்தெடுத்தனர். முடிவில் அனைத்து மாணவர்களுக்கும் பரிசு வழங்கி பாராட்டுத் தெரிவிக்கப்பட்டது.