கோயில் கட்டுமானப் பணி: கற்கள் விழுந்து 4 தொழிலாளர்கள் படுகாயம்

திருப்பூர் அருகே பெரிய பூலுவபட்டியில் கோயில் கட்டுமானப் பணியின்போது, கற்கள் சரிந்து விழுந்து 4 தொழிலாளர்கள் வெள்ளிக்கிழமை படுகாயமடைந்தனர்.

திருப்பூர் மாநகராட்சி, 19-ஆவது வார்டு பெரிய பூலுவபட்டி அம்மன் நகர் பகுதியில், கரியகாளியம்மன் கோயில் கட்டுமானப் பணி நடைபெற்று வருகிறது. இதில், புதுக்கோட்டை மாவட்டத்தைச் சேர்ந்த 10-க்கும் மேற்பட்டத் தொழிலாளர்கள் பணிபுரிந்து வந்தனர். 

இந்நிலையில், வெள்ளிக்கிழமை காலை கட்டுமானப் பணி நடைபெற்றுக் கொண்டிருந்த போது, கோயில் உள்பிரகார மண்டபம் மேற்கூரை அமைக்கும் பணிக்காக, கருங்கற்கள் அடுக்கும் பணியில் தொழிலாளர்கள் ஈடுபட்டிருந்தனர். அப்போது, எதிர்பாராதவிதமாக மேற்கூரையில் அடுக்கி வைக்கப்பட்டிருந்த கற்கள் திடீரென சரிந்து விழுந்தது.

இதில், புதுக்கோட்டை மாவட்டத்தைச் சேர்ந்த தொழிலாளர்கள் முத்தனாபுரம் பாண்டித்துரை (21), தட்டக்குறிச்சி கருப்பையா (21), வி.ஆர்.பொன்னகாட்டுப்பட்டி சத்தியமூர்த்தி (34), லட்சுமிபுரம் சதீஷ் (24)  ஆகியோர் கற்களுக்கிடையே சிக்கி படுகாயமடைந்தனர்.

அலறல் சத்தம் கேட்டு, அருகிலிருந்தவர்கள் தொழிலாளர்களை மீட்டு அருகில் உள்ள தனியார் மருத்துவமனையில் அனுமதித்தனர்.

இதுகுறித்து அனுப்பர்பாளையம் போலீஸார் விசாரணை நடத்தி வருகின்றனர்.