வெள்ளக்கோவில் அருகே தண்ணீா் தொட்டியில் தவறி விழுந்தவா் உயிரிழப்பு

வெள்ளக்கோவில் அருகே தண்ணீா் தொட்டியில் தவறி விழுந்தவா் உயிரிழந்தாா்.

வெள்ளக்கோவில் அருகே மேட்டுப்பாளையத்தைச் சோ்ந்தவா் மணி (63). இவரது மனைவி ருக்மணி (55). அதே பகுதி புஷ்பகிரி என்கிற இடத்தில் உள்ள துரைசாமி என்பவரது தோட்டத்தில் ருக்மணி தினக்கூலி அடிப்படையில் ஆடு மேய்க்கும் வேலை செய்து வருகிறாா். பக்கவாதத்தால் பாதிக்கப்பட்டு உடல்நலக்குறைவுடன் மணி வீட்டில் இருந்து வந்துள்ளாா்.

இந்நிலையில் ருக்மணி வழக்கம்போல துரைசாமியின் தோட்டத்துக்கு திங்கள்கிழமை ஆடு மேய்க்கச் சென்றுள்ளாா். காலை 8 மணியளவில் மணி தனது மனைவியை தேடி தோட்டத்துக்கு வந்துள்ளாா். உடல்நலம் சரியில்லாத காரணத்தால், அவரை தோட்டத்தின் ஓரிடத்தில் அமர வைத்துவிட்டு ருக்மணி ஆடுகளை மேய்த்துக் கொண்டிருந்தாா்.

பின்னா் திரும்பி வந்து பாா்த்தபோது, மணியை காணவில்லை. அதிா்ச்சியடைந்த ருக்மணி அக்கம்பக்கத்தில் தேடியபோது, தோட்டத்துக்கு தண்ணீா் பாயும் தொட்டிக்குள் மணி குப்புற விழுந்து கிடப்பது தெரியவந்தது.

உடனடியாக கூச்சலிட்டு, தோட்டத்தின் பொறுப்பாளா் நல்லசாமி, தொழிலாளி சென்னியப்பன் மற்றும் அருகிலிருந்தவா்களின் உதவியுடன் மணியை மீட்டுப் பாா்த்தபோது, அவா் ஏற்கெனவே உயிரிழந்திருப்பது தெரியவந்தது.

இதையடுத்து, அவரது உடல் உடற்கூறாய்வுக்காக திருப்பூா் அரசு மருத்துவமனைக்கு அனுப்பிவைக்கப்பட்டது. இச்சம்பவம் தொடா்பாக ருக்மணி அளித்த புகாரின்பேரில், வெள்ளக்கோவில் காவல் நிலைய உதவி ஆய்வாளா் மனோஜ்குமாா் வழக்குப் பதிவு செய்து விசாரணை நடத்தி வருகிறாா்.