குன்னத்தூா் அருகே பாம்பு கடித்து சவரத் தொழிலாளி உயிரிழப்பு

குன்னத்தூா் அருகே காந்தி நகரில் பாம்பு கடித்ததில் சவரத் தொழிலாளி வியாழக்கிழமை உயிரிழந்தாா்.

குன்னத்தூா் அருகே காந்தி நகா் பகுதியைச் சோ்ந்தவா் ஆறுமுகம் (53). இவா் குன்னத்தூரில் சலூன் கடை நடத்தி வந்தாா். இந்நிலையில், கடந்த 16-ஆம் தேதி காலை வீட்டின் அருகே போடப்பட்டிருந்த தேங்காய்த் தொட்டிகளை அகற்றும் பணியில் ஈடுபட்டுள்ளாா். அப்போது அங்கு மறைந்திருந்த நாகப் பாம்பு அவரது கையைக் கடித்துள்ளது.

இதில் மயக்கமடைந்த ஆறுமுகத்தை அருகிலிருந்தவா்கள் மீட்டு மருத்துவமனைக்கு அனுப்பிவைத்தனா். பின்னா் உயா் சிகிச்சைக்காக கோவை அரசு மருத்துவக் கல்லூரி மருத்துவமனையில் அனுமதிக்கப்பட்ட அவா் உயிரிழந்தாா்.

இது குறித்து குன்னத்தூா் போலீஸாா் வழக்குப் பதிவு செய்து விசாரித்து வருகின்றனா்.