காய்ச்சல் பாதிப்பு பகுதியில் மருத்துவக் குழுவினர் முகாம்

தருமபுரி மாவட்டம், பாலக்கோடு அருகே மர்மக் காய்ச்சலால் பாதிக்கப்பட்ட பகுதியில் மருத்துவக் குழுவினர் முகாமிட்டு கண்காணித்து வருகின்றனர்.

பாலக்கோடு அருகே சக்கிலிநத்தம் ஊராட்சிக்குள்பட்ட பேவு அள்ளி கிராமத்தில் கடந்த சில நாள்களாகக் குழந்தைகள், பெண்கள், முதியவர்கள் என 50-க்கும் மேற்பட்டோர் மர்மக் காய்ச்சலால் பாதிக்கப்பட்டுள்ளனர்.

இவர்கள், மாரண்டஹள்ளி, பாலக்கோடு, தருமபுரி உள்ளிட்ட இடங்களில் உள்ள அரசு மருத்துவமனைகளில் சிகிச்சை பெற்று வருகின்றனர்.இதுகுறித்து, தகவல் அறிந்த சுகாதாரத் துறை அதிகாரிகள், மருத்துவர்கள், செவிலியர்கள் அடங்கிய மூன்று மருத்துவக் குழுக்களை அமைத்துள்ளனர்.

இந்தக் குழுவினர், பேவுஅள்ளி கிராமத்தில் கடந்த இரண்டு நாள்களாக முகாமிட்டு, காய்ச்சல் பாதிப்புக்குள்ளானோரின் ரத்த மாதிரிகளை எடுத்து சோதனைக்காக அனுப்பியுள்ளனர். மேலும், காய்ச்சல் தடுப்பு நடவடிக்கைகளில் ஈடுபட்டு வருகின்றனர்.