மனைவிக்கு கொலை மிரட்டல்: கணவருக்கு ஓராண்டு சிறை

குடும்பப் பிரச்னையில் மனைவிக்கு கொலை மிரட்டல் விடுத்த கணவருக்கு தருமபுரி நீதிமன்றத்தில் ஓராண்டு சிறைத் தண்டனை விதிக்கப்பட்டது.

தருமபுரி மாவட்டம், கிருஷ்ணாபுரம் அருகேயுள்ள குட்டப்பட்டியைச் சேர்ந்த கூலித் தொழிலாளி பழனி (45). இவரது மனைவி எல்லம்மாள். குடும்பப் பிரச்னைக் காரணமாக கடந்தாண்டு எல்லம்மாளுக்கு பழனி கொலை மிரட்டல் விடுத்தார். இதுகுறித்து கிருஷ்ணாபுரம் போலீஸார் வழக்குப் பதிவு செய்தனர்.

தருமபுரி இரண்டாவது நடுவர் நீதிமன்றத்தில் வழக்கின் இறுதி விசாரணை நடுவர் ரத்தினவேல் பாண்டியன் முன்னிலையில் திங்கள்கிழமை நடைபெற்றது. இதில், பழனிக்கு ஓராண்டு சிறைத் தண்டனை விதிக்கப்பட்டது.