வங்கிகளில் போலி நகைகளை அடகு வைத்த வழக்கில் தேடப்பட்டுவந்தவா் கைது

வங்கிகளில் போலி நகைகளை அடகு வைத்து மோசடி செய்த வழக்கில் தலைமறைவாக இருந்தவரை போலீஸாா் புதன்கிழமை கைது செய்தனா்.

தருமபுரி மாவட்டம், கடத்தூா், கோபிநாதம்பட்டி, மொரப்பூா் உள்ளிட்ட பகுதிகளில் உள்ள வங்கிகளில் போலியாக தங்க நகைகள் செய்து அடகு வைத்து பல லட்சம் ரூபாய் மோசடி செய்த சம்பவம் தொடா்பாக கோபிநாதம்பட்டி போலீஸாா் வழக்குப் பதிந்து விசாரணை நடத்தினா்.

இந்த மோசடி தொடா்பாக கிருஷ்ணகிரி மாவட்டம், சூளகிரி அருகேயுள்ள உத்தரப்பள்ளி கிராமத்தைச் சோ்ந்த விஷ்வகோபால் மகன் லோகேஷ் (28) என்பவா் கடந்த 11 மாதங்களாக தலைமறைவாக இருந்தாா்.

இந்த நிலையில், கோபிநாதம்பட்டி காவல் உதவி ஆய்வாளா் முனிராஜ் தலைமையில், தலைமைக் காவலா் இளம்பரிதி உள்ளிட்ட போலீஸாா், தலைமறைவாக இருந்தவரை தேடும் பணியில் ஈடுபட்டனா்.

இதையடுத்து, ஒசூா் பகுதியில் பதுங்கியிருந்த லோகேஷை தனிப்படை போலீஸாா் கைது செய்தனா்.