தருமபுரியில் நகராட்சியில் 18 பள்ளிகளில் காலை உணவுத் திட்டம் விரிவாக்கம்

தமிழக அரசின் காலை உணவுத் திட்ட விரிவாக்கம் தருமபுரி நகராட்சியில் 18 பள்ளிகளில் செவ்வாய்க்கிழமை தொடங்கிவைக்கப்பட்டது.

தருமபுரி நகராட்சியில் ஏற்கெனவே 1 முதல் 5 ஆம் வகுப்பு வரை உள்ள 13 நகராட்சிப் பள்ளிகள் மற்றும் 1 அரசு உதவி பெறும் பள்ளியில் பயின்று வரும் 724 மாணவ மாணவிகளுக்கு காலை உணவு வழங்கப்பட்டு வருகிறது. தற்போது, காமராஜா் காலை உணவுத் திட்டம் 6 முதல் 8-ஆம் வகுப்பு வரை மாணவா்களுக்கு விரிவாக்கம் செய்யப்பட்டுள்ளது.

அதனடிப்படையில் தருமபுரி நகராட்சிக்கு உள்பட்ட 14 நகராட்சிப் பள்ளிகள், 3 அரசுப் பள்ளிகள் மற்றும் 1 அரசு உதவிபெறும் பள்ளி என மொத்தம் 18 பள்ளிகளில் 1 முதல் 8ஆம் வகுப்பு வரை பயிலும் 1,961 மாணவ, மாணவிகளுக்கு காலை உணவுத் திட்டம் விரிவுபடுத்தப்பட்டு செயல்படுத்தப்பட்டுள்ளது.

முன்னதாக தருமபுரி நகராட்சிப் பள்ளியில் நடைபெற்ற நிகழ்ச்சியில் நகா்மன்றத் தலைவா் லட்சுமி மாது, சுகாதார அலுவலா்கள் உணவு விரிவாக்கத்தை பாா்வையிட்டு ஆய்வு செய்தனா்.