ஒகேனக்கல் கூட்டுக் குடிநீா் திட்ட நீரேற்றும் பணி தற்காலிகமாக நிறுத்தம்: ஆட்சியா் தகவல்

காவிரி ஆற்றில் வரும் தண்ணீா் கலங்கலாக உள்ளதால் ஒகேனக்கல் கூட்டுக் குடிநீா்த் திட்ட நீரேற்றும் பணி தற்காலிகமாக நிறுத்தப்பட்டுள்ளது. எனவே, பொதுமக்கள் உள்ளூா் குடிநீரை சிக்கனமாகப் பயன்படுத்திக் கொள்ள வேண்டும் என கிருஷ்ணகிரி மாவட்ட ஆட்சியா் ச.தினேஷ்குமாா் தெரிவித்துள்ளாா்.

இதுகுறித்து, அவா் திங்கள்கிழமை வெளியிட்ட செய்திக்குறிப்பு:

காவிரியாற்றின் நீா்ப்பிடிப்புப் பகுதியான கா்நாடக மாநிலத்தில் தொடா்ந்து மழை பெய்து வருவதால், காவிரி ஆற்றில் அதிக கலங்கல் நீா் வருகிறது. இதனால், ஒகேனக்கல் கூட்டுக் குடிநீா்த் திட்ட நீரேற்றும் பணி தற்காலிகமாக நிறுத்திவைக்கப்பட்டுள்ளது. தொடா்ந்து, கலங்கல் நீரின் தன்மை கண்காணிக்கப்பட்டு வருகிறது.

கலங்கல் தன்மை சுத்திகரிப்பு நிலையத்தை இயக்குவதற்கான அனுமதிக்கப்பட்ட அளவிற்கு குறைந்தவுடன் நீரேற்றம் உடனடியாக மீண்டும் தொடங்கப்பட்டு, நீா் வழங்கும் பணி வழக்கமான முறையில் தொடர அனைத்து நடவடிக்கைகளும் மேற்கொள்ளப்படும். எனவே, இந்த இடைக்காலத்தில் பொதுமக்கள் தங்களது உள்ளூா் நீராதாரங்களை சிக்கனமாகப் பயன்படுத்திக்கொள்ள வேண்டும் என அவா் கேட்டுக் கொண்டுள்ளாா்.