பெண்ணை கேலி செய்ததாக 4 பேர் கைது

பரமத்தி வேலூர் வட்டம், பாண்டமங்கலம் அருகே, கோப்பனம்பாளையத்தில் பெண்ணைக் கேலி செய்ததாக 4 பேரை பரமத்தி வேலூர் போலீஸார் கைது செய்தனர்.

கோப்பனம்பாளையத்தைச் சேர்ந்தவர் வேலுச்சாமி (30). இவர் தனது மனைவி, மனைவியின் தங்கையுடன் இரு சக்கர வாகனத்தில் சென்று கொண்டிருந்தாராம். அப்போது, அதே பகுதியைச் சேர்ந்த முருகேசன் மகன் மாயவன் (24), சண்முகம் மகன் சுரேஷ் (26), குமரேசன் மகன் சக்திவேல் (19), மணி மகன் குணசேகரன் (26) ஆகிய நான்கு பேரும் பெண்களை கேலி செய்தனராம்.

இதையடுத்து, வேலுச்சாமி அவர்களைத் தட்டிக்கேட்டாராம். இதில், வாய்த்தகராறு ஏற்பட்டதாம். பின்னர், ஞாயிற்றுக்கிழமை இரவு நான்கு பேரும் வேலுச்சாமியின் வீட்டுக்குச் சென்று அவரைத் தாக்கினராம். இதில், காயமடைந்த வேலுச்சாமி பரமத்தி வேலூர் அரசு மருத்துவமனையில் சேர்க்கப்பட்டார்.

இதுகுறித்த புகாரின் பேரில், பரமத்தி வேலூர் போலீஸார் வழக்குப் பதிவு செய்து 4 பேரையும் கைது செய்தனர்.