முறைகேடு குறித்து ஆட்சியரிடம் புகார் அளித்தவருக்கு மிரட்டல்

முறைகேடு குறித்து மாவட்ட ஆட்சியரிடம் புகார் அளித்தவரை ஊராட்சித் தலைவர், அவரது கணவர் ஆகியோர் மிரட்டுவதாக சனிக்கிழமை புகார் அளிக்கப்பட்டுள்ளது.

பள்ளிபாளையம் ஊராட்சி ஒன்றியம், களியனூர் ஊராட்சித் தலைவர் ராதாமணி. இந்த ஊராட்சியில், மின் சாதனப் பொருள்கள், குடிநீர்க் குழாய், பொதுக்கழிப்பிடம் ஆகிவற்றுக்கான கட்டுமானப் பொருள்கள் வாங்கியது, பொக்லைன் இயந்திர வாடகை போன்ற பல்வேறு செலவுகள் ஊராட்சி சார்பில் மேற்கொள்ளப்படுகிறது.

விற்பனை நிறுவனங்களின் பெயரில் போலியாக ரசீது தயாரித்து, செய்யாத பணிகளுக்குப் பணம் எடுத்து வருவதாக, களியனூர் கிராமத்தை சேர்ந்த அர்ஜூனன் என்பவர் நாமக்கல் மாவட்ட ஆட்சியரிடம் அண்மையில் புகார் மனு அளித்தார்.

பள்ளிபாளையம் மற்றும் குமாரபாளையம் பகுதிகளில் உள்ள விற்பனை நிலையங்களில் ஒரு முறை ரசீது வாங்கிக்கொண்டு, பிறகு அந்த நிறுவனத்தின் பெயரில் போலியாக ரசீது தயாரித்து வேலை செய்யாமலேயே பணம் எடுக்கப்படுகிறது. சில போலி ரசீதுகளில் என்னுடைய செல்லிடப்பேசி எண் அச்சிடப்பட்டுள்ளது. போலி ஆவணம் தயாரித்து அரசுப் பணத்தை மோசடி செய்து வரும் ஊராட்சித் தலைவர் மற்றும் அவரது கணவர் மீது நடவடிக்கை எடுக்க வேண்டும் எனத் தெரிவித்திருந்தார். இந்நிலையில் ஊராட்சித் தலைவர் ராதாமணி, கணவர் ராமலிங்கம் ஆகியோர் புகாரை திரும்பப் பெற வேண்டும் என தன்னை மிரட்டுவதாக அர்ஜூனன் பள்ளிபாளையம் காவல் நிலையத்தில் சனிக்கிழமை புகார் அளித்துள்ளார். இதுகுறித்து போலீஸார் விசாரணை நடத்தி

வருகின்றனர்.