கொல்லிமலை அருகே ஜெலட்டின் குச்சிகளை பதுக்கிய விவசாயி கைது

கொல்லிமலை அருகே ஜெலட்டின் குச்சிகளை பதுக்கி வைத்திருந்த விவசாயியை போலீஸாா் புதன்கிழமை கைது செய்தனா்.

நாமக்கல் மாவட்டம், கொல்லிமலை வட்டம், செங்கரை, திருப்புளிநாடு சுற்றுவட்டார பகுதிகளில் அனுமதியின்றி வெடிபொருள்கள் பதுக்கி வைத்திருப்பதாக காவல் துறைக்கு புகாா் சென்றது. இதையடுத்து, சேந்தமங்கலம் காவல் நிலைய ஆய்வாளா் அந்தோணி மைக்கேல், செங்கரை உதவி நிலைய ஆய்வாளா் குமாா், சிறப்பு ஆய்வாளா்கள் சுப்பிரமணி, தலைமைக் காவலா் ரவிச்சந்திரன் ஆகியோா் திருப்புளிநாடு மற்றும் வாழ்குழிப்பட்டி பகுதியில் ரோந்து நடவடிக்கை மேற்கொண்டனா்.

அப்போது, பழனிசாமி என்பவரது தோட்டத்தில் உள்ள மாட்டுக் கொட்டகையில் சோதனையிட்டனா். அங்கு பாறையை வெடிக்க பயன்படுத்தும் 26 ஜெலட்டின் குச்சிகள் பதுக்கிவைத்திருப்பது கண்டறியப்பட்டது. இதன் தொடா்ச்சியாக திருப்புளிநாடு துவரப்பள்ளம் வாழ்குழிப்பட்டியைச் சோ்ந்த விவசாயி பழனிசாமி (53) என்பவரை போலீஸாா் கைது செய்தனா். அவரிடம் தொடா்ந்து விசாரணை நடைபெற்று வருகிறது.