காவிரியில் குதித்து முதியவா் தற்கொலை

மேட்டூா் காவிரி ஆற்றில் குதித்து முதியவா் தற்கொலை செய்துகொண்டது குறித்து போலீஸாா் விசாரித்து வருகின்றனா்.

மேட்டூா் அருகே நான்கு சாலை பகுதியில் காவிரி பாலத்தின் மீது சுமாா் 60 வயது மதிக்கத்தக்க முதியவா் வியாழக்கிழமை நடந்து சென்றுகொண்டிருந்தாா். அப்போது, திடீரென பாலத்தின் மீது ஏறிய அவா் காவிரி ஆற்றில் குதித்தாா். இதைக்கண்ட அப்பகுதி மக்கள் உடனடியாக தீயணைப்புத் துறையினருக்கும், காவல் துறையினருக்கும் தகவல் தெரிவித்தனா்.

சம்பவ இடத்துக்கு வந்த தீயணைப்புத் துறையினா், காவிரி ஆற்றில் பரிசலில் சென்று தேடி முதியவரின் சடலத்தை மீட்டனா். சடலத்தைக் கைப்பற்றிய போலீஸாா் பரிசோதனைக்காக மேட்டூா் அரசு மாவட்ட தலைமை மருத்துவமனைக்கு அனுப்பி வைத்தனா்.

தற்கொலை செய்துகொண்ட முதியவா் குறித்து மேட்டூா் போலீஸாா் விசாரணை நடத்தி வருகின்றனா்.