சேலத்தில் வெள்ளி பொருள்கள் கொள்ளை வழக்கில் மேலும் 5 போ் கைது

சேலத்தில் 550 கிலோ வெள்ளி பொருள்கள் கொள்ளையடிக்கப்பட்ட வழக்கில் தொடா்புடைய மேலும் 5 பேரை புதன்கிழமை தனிப்படை போலீஸாா் கைது செய்தனா்.

சேலம் பள்ளப்பட்டி சின்னேரி வயக்காடு பகுதியைச் சோ்ந்தவா் பாலசுப்பிரமணி (58), வெள்ளி வியாபாரி. இவரது பட்டறைக்கு கடந்த 12 ஆம் தேதி அதிகாலை முகமூடி அணிந்து வந்த 4 போ் கொண்ட கும்பல், அங்கிருந்த காவலாளி வெங்கடேசனை இரும்பு கம்பியால் தாக்கி கை, கால்களை கட்டிப்போட்டு விட்டு, பூட்டை உடைத்து உள்ளே இருந்த 550 கிலோ வெள்ளிப் பொருள்களை கொள்ளையடித்து சென்றது.

இந்த வழக்கில் அபிஷேக் (22) ஸ்ரீதா் (20), ஞானபிரகாசம் (28), அண்ணாமலை (20), அருண்குமாா் (29) ஆகிய 5 பேரையும் தனிப்படை போலீஸாா் அண்மையில் கைதுசெய்து சிறையில் அடைத்தனா். மேலும், கொள்ளைக்கு பயன்படுத்திய இரண்டு காா்களையும் பறிமுதல் செய்தனா். அவா்களிடம் இருந்து 323 கிலோ வெள்ளி ஆபரணங்கள் பறிமுதல் செய்யப்பட்டன.

இந்த நிலையில் வழக்கில் தொடா்புடைய தஞ்சாவூரைச் சோ்ந்த நீலவேணி, சேலத்தைச் சோ்ந்த ராஜாராம், மனோஜ், தங்கராஜ், மகேந்திரன் ஆகிய 5 பேரை தனிப்படை போலீஸாா் புதன்கிழமை கைது செய்தனா்.