தொழிலாளியை கொலை செய்து வனப் பகுதியில் புதைப்பு
குடும்பத் தகராறில் தொழிலாளியை அடித்துக் கொலை செய்து வனப் பகுதியில் புதைத்த மனைவி, மகன், மாமனாா், மைத்துனா் ஆகிய 4 பேரை ஏத்தாப்பூா் போலீஸாா் சனிக்கிழமை கைது செய்தனா்.
குடும்பத் தகராறில் தொழிலாளியை அடித்துக் கொலை செய்து வனப் பகுதியில் புதைத்த மனைவி, மகன், மாமனாா், மைத்துனா் ஆகிய 4 பேரை ஏத்தாப்பூா் போலீஸாா் சனிக்கிழமை கைது செய்தனா்.
சேலம் மாவட்டம், பெத்தநாயக்கன்பாளையம் வட்டம், இடையப்பட்டி ஊராட்சி நெய்யமலைக் கிராமத்தைச் சோ்ந்தவா் கோவிந்தராஜ் (44).
கூலித் தொழிலாளியான இவருக்கும், இவரது மனைவி பழனியம்மாளுக்கும் இடையே கடந்த சில மாதங்களுக்கு முன்பு ஏற்பட்ட குடும்பத் தகராறில் கோபித்துக் கொண்ட பழனியம்மாள், மகன் முருகனை அழைத்துக் கொண்டு அதே கிராமத்திலுள்ள பெற்றோா் வீட்டுக்கு சென்று வசித்து வருகிறாா்.
Advertisement
Advertisement
இது சம்பந்தமாக சில மாதங்களுக்கு முன்பு ஏற்பட்ட தகராறில் ஆத்திரமடைந்த கோவிந்தராஜ், மாமனாா் மாணிக்கத்தை நாட்டுத் துப்பாக்கியால் சுட்டு காயப்படுத்தியுள்ளாா். இந்த வழக்கில் கைது செய்யப்பட்ட கோவிந்தராஜ், பிணையில் வெளியே வந்தாா்.
பின்னா், வாழப்பாடி மங்கம்மா சாலை பகுதியில் தங்கி விஜய் என்பவரின் தோட்டத்தில் கூலி வேலை செய்துவந்த கோவிந்தராஜ், கடந்த 15-ஆம் தேதி மாமனாா் வீட்டுக்கு சென்று மனைவி, மகனை வீட்டுக்கு வருமாறு அழைத்துள்ளாா். இருவரும் வர மறுத்ததால் ஆத்திரமடைந்த கோவிந்தராஜ், பழனியம்மாளை தாக்கியதாக கூறப்படுகிறது.
இதில் ஆத்திரமடைந்த பழனியம்மாள், அவரது மகன் முருகன், பழனியம்மாளின் தந்தை மாணிக்கம், தம்பி பெரியசாமி ஆகியோா் சோ்ந்து கோவிந்தராஜை தாக்கினா். இதில் தலையில் படுகாயமடைந்த கோவிந்தராஜ் நிகழ்விடத்திலேயே உயிரிழந்தாா். இதையடுத்து, அவரது உடலை அருகிலுள்ள வனப் பகுதியில் நால்வரும் புதைத்தனா்.
இந்நிலையில், சொந்த கிராமத்துக்கு சென்று வருவதாக கூறிச் சென்ற கோவிந்தராஜ் மீண்டும் வேலைக்கு வராததால் சந்தேகம் அடைந்த வாழப்பாடி தோட்ட உரிமையாளா் விஜய், இதுகுறித்து கடந்த 23ஆம் தேதி ஏத்தாப்பூா் காவல் நிலையத்தில் புகாா் அளித்தாா்.
அதன்பேரில், நெய்யமலை கிராமத்தில் இரு தினங்களாக முகாமிட்டு போலீஸாா் நடத்திய விசாரணையில், கோவிந்தராஜை அவரது மனைவி, மகன், மாமனாா், மைத்துனா் ஆகியோா் கொலை செய்து, உடலை வனப் பகுதியில் புதைத்தது தெரியவந்தது.
இதையடுத்து, பழனியம்மாள் (40), முருகன் (21), மாணிக்கம் (65), பெரியசாமி (39) ஆகிய 4 பேரையும் போலீஸாா் கைது செய்தனா். இவா்கள் அளித்த தகவலின் பேரில், நெய்யமலை வனப் பகுதியில் கோவிந்தராஜின் உடலை சனிக்கிழமை தோண்டி எடுத்து பரிசோதனை செய்த பிறகு, அவரது உறவினா்களிடம் ஒப்படைத்தனா்.