ரூ.70 லட்சம் மோசடி: பொறியாளர் கைது

ஆன்லைனில் தங்கம் வாங்கித் தருவதாகக் கூறி  மோசடி செய்த சென்னையைச் சேர்ந்த பொறியாளரை திண்டுக்கல் மாவட்ட குற்றப்பிரிவு போலீஸார் சனிக்கிழமை கைது செய்தனர்.
    திண்டுக்கல் மாவட்டம், எரியோடு பகுதியைச் சேர்ந்தவர் சுப்பிரமணி. ஆன் லைன் வர்த்தக நிறுவனம் நடத்தி வருகிறார். இந்நிலையில், சென்னை ரெட்டேரி பகுதியைச் சேர்ந்த குணசேகரன், பூந்தமல்லியைச் சேர்ந்த பொறியாளர் செல்வம் (42) ஆகியோர்,  குறைந்த விலைக்கு தங்கம் வாங்கித் தருவதாக சுப்பிரமணியை அணுகியுள்ளனர். 
 இதனை அடுத்து ரூ.70 லட்சத்தை, குணேசேகரன் மற்றும் செல்வம் ஆகியோரிடம் சுப்பிரமணி கொடுத்துள்ளார். ஆனால், தங்கம் வாங்கி கொடுக்காமலும், பணத்தை திரும்ப ஒப்படைக்காமலும், சுப்பிரமணியை ஏமாற்றி வந்துள்ளனர். இதனால் அதிர்ச்சி அடைந்த சுப்பிரமணி, இதுகுறித்து திண்டுக்கல் மாவட்ட காவல் கண்காணிப்பாளர் அலுவலகத்தில் சில நாள்களுக்கு முன்பு புகார் அளித்துள்ளார்.  
 அதன்பேரில், மாவட்ட குற்றப்பிரிவு போலீஸார் வழக்குப் பதிவு செய்து விசாரணை மேற்கொண்டு வந்தனர். இந்நிலையில், ரூ.70 லட்சம் மோசடி தொடர்பாக சென்னையைச் சேர்ந்த பொறியாளர் செல்வத்தை, போலீசார் கைது செய்துள்ளனர்.