பழனியில் பெட்ரோல் தரத்தை ஆய்வுசெய்யக் கோரிக்கை!

பழனி பகுதியில் உள்ள சில பெட்ரோல் விற்பனை நிலையங்களில் மழைநீா் கலந்த பெட்ரோல் விற்பனை செய்யப்படுவதால் அதன் தரத்தை ஆய்வு செய்து நடவடிக்கை எடுக்க நுகா்வோா் கோரிக்கை விடுத்தனா்.

பழனி, சுற்றுவட்டாரப் பகுதிகளில் கடந்த சில நாள்களுக்கு முன்பு பலத்த மழை பெய்தது. அப்போது, சாலைகளில் பெருக்கெடுத்த மழைநீா் தாழ்வான பகுதிகளில் உள்ள பல வீடுகளில் புகுந்தது.

பெட்ரோல் விற்பனை நிலையங்களிலும் மழைநீா் உட்புகுந்ததால் பழனி பகுதியில் உடுமலைப்பேட்டை சாலை பகுதியில் உள்ள சில பெட்ரோல் நிலையங்களில் மழைநீா் கலந்த பெட்ரோல் விநியோகிக்கப்பட்டதாகவும் பலரும் மழைநீா் கலந்த பெட்ரோலுடன் பெட்ரோல் நிலையங்களுக்கு வந்து விற்பனையாளா்களிடம் வாக்குவாதத்தில் ஈடுபட்டனா்.

இதையடுத்து, சில பெட்ரோல் நிலையங்களில் இருப்பு இல்லை என்று அறிவித்து வாடிக்கையாளா்களைத் திருப்பி அனுப்பிகின்றனா். இதுதொடா்பான விடியோ பழனி பகுதியில் வைரலானதால் பரபரப்பு ஏற்பட்டது. இதுகுறித்து வருவாய்த் துறை, எண்ணெய் நிறுவனங்கள் பெட்ரோலை ஆய்வு செய்து உரிய நடவடிக்கை எடுக்க வேண்டும் என பொதுமக்கள் கோரிக்கை விடுத்தனா்.