போலீஸ் போல நடித்து பெண்ணிடம் 3 பவுன் நகை திருட்டு

மதுரையில் பெண்ணிடம் போலீஸ் போல நடித்து 3 பவுன் நகையை திருடிச்சென்ற இருவர் மீது போலீஸார் ஞாயிற்றுக்கிழமை வழக்குப்பதிவு செய்து விசாரித்து வருகின்றனர்.
மதுரை நரிமேடு பிரசாத் சாலையைச் சேர்ந்த தேவராஜ் மனைவி எஸ்தர் (62). இவர் நரிமேடு கதீட்ரல் தேவாலயம் வழியாக ஞாயிற்றுக்கிழமை நடந்து சென்றுள்ளார். அப்போது அங்கு வந்த இருவர் எஸ்தரை வழிமறித்து, தங்களை போலீஸார் என்று அறிமுகப்படுத்திக் கொண்டனர். பின்னர் அப்பகுதியில் சற்று முன்னர் சங்கிலி பறிப்பு நடந்தாகவும்,  கழுத்தில் நகையுடன் தனியாக செல்ல வேண்டாம் என்று கூறி, எஸ்தர் கழுத்தில் அணிந்திருந்த 3 பவுன் சங்கிலியை வாங்கி காகிதத்தில் மடித்துக் கொடுத்துள்ளனர். அதை வாங்கிய எஸ்தர் வீட்டுக்குச் சென்ற பின்னர் காகிதத்தை பிரித்துப்பார்த்துள்ளார். அப்போது காகிதத்தில் சங்கிலிக்கு பதிலாக கற்கள் மட்டுமே இருந்துள்ளது. இதையடுத்து தான் ஏமாற்றப்பட்டதை அறிந்த எஸ்தர் சம்பவம் தொடர்பாக தல்லாகுளம் காவல்நிலையத்தில் புகார் அளித்துள்ளார். அதன்பேரில் போலீஸார் வழக்குப்பதிவுசெய்து விசாரித்து வருகின்றனர்.